I dështuar po cilësohet shtrati i lumit Nerodime që kushtoi 270 mijë euro [video]

11 Dhjetor 2016 - 21:31      

Projekti për rregullimin e shtratit të lumit Nerodime në Ferizaj, për të cilin ishin investuar 270 mijë euro, po konsiderohet i dështuar nga opozita dhe shoqëria civile në këtë qytet.

Ky projekt i finalizuar në vitin e kaluar me buxhet të Ministrisë së Mjedisit dhe Planifikimit Hapësinor në bashkëfinancim me komunën, sipas opozitës, është degraduar si pasojë e punimeve të dobëta, raporton KTV.

Por pavarësisht kësaj, komisioni komunal e kishte bërë pranimin teknik të projektit.

Gazmend Bytyqi nga PDK-ja ka akuzuar komunën për keqmenaxhim të parasë publike gjatë implementimit të projektit.

Sipas tij, buxhetin nga donatorët dhe hartimin e këtij projekti e kishte siguruar pushteti i kaluar në fund të mandatit, mirëpo gjatë implementimit, pushteti aktual nuk i kishte mbikëqyrur punimet.

“Ky projekt konsiderojmë se ka dështuar, andaj edhe nëpërmjet mbledhjeve të KK-së e kemi akuzuar komunën për keqmenaxhim të parasë publike... mungojnë ndriçimi publik, gjelbërimi, rruga për biçiklistë etj”.

Në rrjetin e OJQ-ve “Avonet”, thonë se për shkak të cilësisë së dobët të punimeve, janë dëmtuar muret mbrojtës.

“Konsiderojmë se ky projekt është i dështuar”, ka thënë Kenan Gashi, nga AVONET.

Edhe qytetarët e kësaj komune janë shprehur të shqetësuar për gjendjen e shtratit të lumit, i cili brenda një periudhe të shkurtët është degraduar.

Nga ana tjetër, Gafurr Ilazi, drejtor i infrastrukturës në komunën e Ferizajt, ka thënë se pas finalizimit të këtij projekti, në vitin e kaluar ishin shfaqur disa defekte si pasojë e vërshimeve të mëdha në disa pjesë të shtratit të lumit.
“Gjatë vitit të kaluar, së bashku me kompaninë, kemi intervenuar për riparimin e defekteve në shtratin e lumit Nerodime sepse në disa pjesë vërshimet....”, ka thënë ai.

Ilazi ka sqaruar se për realizimin e këtij projekti gjatë vitit të kaluar, komuna dhe Ministria e Mjedisit kanë investuar gjithsejtë 270 mijë euro.

I dështuar po cilësohet shtrati i lumit... by kohanet

© KOHA. Të gjitha të drejtat janë të rezervuara.