Gjakova kërkon mbështetjen për një qendër më të avancuar të mjekësisë familjare

9 Dhjetor 2016 - 12:30      

Prishtinë, 9 dhjetor - Ministri i Shëndetësisë Imet Rrahmani priti sot kryetaren e Gjakovës, znj. Mimoza Kusari me të cilën biseduan për mundësitë e fuqizimit të Kujdesit Parësor Shëndetësor përmes projekteve të përbashkëta.

Në këtë takim, znj. Kusari e ka njoftuar ministrin Rrahmani me angazhimet që Komuna është duke i bërë për përmirësimin e infrastrukturës shëndetësore me theks në angazhimet për ngritjen e një Qendre kryesore të re të Mjekësisë Familjare, ku kontributi i Ministrisë dhe donatorëve do të ishte i nevojshëm.

Ministri Rrahmani ka theksuar se MSh ka ndihmuar komunat përmes projekteve të ndryshme në fuqizimin e Kujdesit Parësor Shëndetësor dhe do të angazhohet që edhe Komuna e Gjakovës të jetë pjesë e realizimit të projekteve të përbashkëta.

Në takim është biseduar edhe për çështje të tjera në të cilat nivelet e ndryshme të Kujdesit Shëndetësor do ta ndihmonin njëri-tjetrin.
 

© KOHA