Zona e parkut në Prizren, edhe për persona me aftësi të kufizuara

9 Dhjetor 2016 - 14:17      

Prizren, 9 dhjetor – Organizata joqeveritare “EC Ma Ndryshe” të enjten ka njoftuar se bashkë me OPMDK-në kanë publikuar raportin e vizionimit dhe kanë realizuar performancën publike: "Parku i qytetit për të gjithë", përmes të cilave aktivitete kërkojnë që kjo hapësirë e gjelbër të rivitalizohet për shërbim të të gjitha kategorive të shoqërisë.

Aktivistët nga shoqëria civile kanë pohuar se kjo zonë duhet të adaptohet edhe për nevoja të personave me aftësi të kufizuara.

“Pas konsultimeve disamujore me grupe të ndryshme të PAK-ve dhe qytetarëve shfrytëzues të rregullt të parkut, është hartuar vizioni për rivitalizimin e Parkut të Qytetit dhe adaptimin e kësaj hapësire të gjelbër publike edhe për nevoja të PAK-ve. Në kuadër të performancës publike janë prezantuar kërkesat që dalin nga vizionimi për intervenime si për krijimin e trotuareve të qasshme për të gjithë, rampave të reja te shkallët ekzistuese dhe tek ura, tualeteve për PAK-ët te tualeti publik ekzistues, hapësirave të lodrave për të gjithë fëmijët, fushës multifunksionale, parkimit për PAK-ët, stolave për të gjithë, etj.”, ka thënë Valon Xhabali, koordinator programi në “EC Ma Ndryshe”.

Publikimi i raportit të vizioni dhe realizimi i performancës publike :"Parku i qytetit për të gjithë" janë realizuar në kuadër të projektit “Prizreni, një qytet pa pengesa”, që synon ngritjen e pjesëmarrjes së PAK-ve dhe të rinjve në projektimin e qytetit që ofron shërbime e mundësi të barabarta për të gjithë (më shumë, sot në “Kohën Ditore”).

© KOHA