Veseli sërish në fushatë për Drenasin

29 Nëntor 2016 - 20:11      

Kryetari i Partisë Demokratike e Kosovës, Kadri Veseli i shoqëruar nga Ramiz Lladrovci, kandidat i PDK-së për kryetar të Drenasit, kanë takuar qindra qytetarë në takime të ndara për të shpalosur para tyre vizionin qeverisës dhe projektet kapitale për Komunën e Drenasit, njofton kumtesa partiake, transmeton Koha.net.

Kadri Veseli tha se zgjedhjet e jashtëzakonshme në Drenas kanë ardhur si pasojë e dënimeve ndaj ish-luftëtarëve të UÇK-së, por siç tha ai, askush nuk mund ta dëmtojë Drenicën dhe Drenasin.
"Ata që e kanë sfiduar Drenicën, ata që e kanë sfiduar Drenasin edhe kësaj radhe, më 4 dhjetor, do ta marrin përgjigjen e merituar, ku kryetari i ri, Ramiz Lladrovci, do të shënojë fitore të thellë me mbi 80 për qind", tha Veseli.

Ai tha se me Ramiz Lladrovcin kryetar, komuna e Drenasit do të ketë zhvillim edhe më të madh ekonomik.
"Më 4 dhjetor, në mënyrë të dinjitetshme, ashtu si di Drenica, dilni në zgjedhje të gjithë dhe votoni e festoni fitoren e fuqishme, fitoren e cila do t'ju japë përgjigje të gjithë atyre që tentojnë ta dëmtojnë Ushtrinë Çlirimtare dhe Partinë Demokratike të Kosovës", tha Veseli.

Kandidati i PDK-së për kryetar të Drenasit, Ramiz Lladrovci i ka siguruar banorët e komunës së Drenasit se do të jetë afër tyre dhe do të kujdeset që përveç investimeve nga buxheti i komunës, të sjell në Drenas edhe shumë projekte nga Qeveria dhe nga investitorë të jashtëm.