Në Zhabar, mbi 1800 metra rrugë janë duke u asfaltuar

26 Nëntor 2016 - 16:06      

Kanë nisur punët për asfaltimin edhe të disa rrugëve të Zhabarit. Kryetari i Komunës së Mitrovicës, Agim Bahtiri dhe drejtori i Drejtorisë për Infrastrukturë dhe Shërbime Publike, Besnik Beka, kanë inspektuar punët në asfaltimin e këtyre rrugëve që po i kryen NN “Shkëmbi” nga Drenasi, me qëllim që ato të bëhen në mënyrë cilësore dhe të respektohen të gjithë parametrat e paraparë të projektit.

Në të gjitha këto rrugë, në gjatësi prej mbi 1.800 e gjerësi prej pesë metrash, përveç asfaltimit të paraparë në dy shtresa me trashësi prej 11 metrash, do të ndërtohen edhe kanalizimet atmosferike e fekale dhe trotuaret.

Asfaltimi i rrugëve do të përfundoj brenda pak ditësh, pasi që shtresa e parë prej shtatë centimetrash pothuaj se ka përfunduar në të gjitha rrugët, ndërsa që ka mbetur për tu shtruar edhe shtresa e dytë prej katër centimetrash, që është punë më e lehtë që duhet bërë.

Asfaltimi i të gjithë këtyre rrugëve dhe rregullimi i kanalizimeve dhe trotuareve, arrin vlerën prej 287.000 euro, mjete këto që janë sigurua nga Ministria e Administrimit të Pushtetit Lokal dhe komunës së Mitrovicës.

Edhe gjatë këtij inspektimi, kryetari Bahtiri ju tha qytetarëve që kishin dalë për ta falënderuar për realizimin e premtimit të dhënë, se aktualisht janë duke u asfaltuar, kubëzuar apo meremetuar me zhavorr edhe dhjetëra rrugë, si në qytetet e periferi, ashtu edhe nëpër fshatra.

“Sivjet është bërë një punë mjaftë e madhe në rregullimin e infrastrukturës rrugore dhe kanalizimeve. Kemi kursyer shumë mjete dhe kemi pas mbështetjen e ministrive të ndryshme për të realizuar këto projekte, që do t’ua lehtësojnë jetën qytetarëve. Në realizimin e kaq shumë projekteve, ka ndikuar edhe angazhimi ynë konkret që të mos lejojmë që çmimet të fryhen, si dhe zhdukja e mitos dhe korrupsionit, gjë që ka bërë që punëkryesit të jenë më të arsyeshëm në çmime, pasi që më askush nuk ju ka kërkuar para”, tha ndër të tjera Bahtiri. 

© KOHA. Të gjitha të drejtat janë të rezervuara.