Komuna e Malishevës ndihmon familjet e evakuuara gjatë vërshimeve

13 Nëntor 2016 - 10:37      

Komuna e Malishevës, përkatësisht Drejtoria për Mbrojtje dhe Shpëtim, dje dhe sot ka vazhduar me përkrahjen e dhjetë familjeve të evakuuara gjatë ditëve të vërshimeve të kësaj jave.

Këto familje janë mbështetur me pako familjare, me qëllim të tejkalimit të situatës emergjente, që janë ballafaquar këto ditë.

Sipas zyrtarit për emergjenca, në Drejtorinë për Mbrojtje dhe Shpëtim, Halit Mazreku, gjatë vërshimeve, janë detyruar t’i largojnë dhjetë familje nga shtëpitë e tyre të banimit, “ndërsa këto familje janë mbështetur me ndihma emergjente, me qëllim të tejkalimit dhe përballimit të kësaj situate, pasi të njëjtëve ju janë dëmtuar të mirat materiale, përkatësisht ushqimet dhe veshmbathjet”.

Këto familje, sipas Mazrekut, janë ndihmuar me pako ushqimore, higjienike dhe veshmbathje, përkatësisht me miell, vaj, sheqer, patate, oriz, dhe ushqime tjera, si dhe me pako higjienike, si dhe me batanije për tu mbuluar. 

© KOHA. Të gjitha të drejtat janë të rezervuara.