Vazhdon fushata “Ta Pastrojmë Kosovën”

28 Tetor 2016 - 15:22      

Lëvizja Mjedisore “Let’s Do It Kosova” po vazhdon edhe më tej organizimin e aksioneve për eliminimin e deponive ilegale të mbeturinave dhe vetëdijësimin e qytetarëve për rëndësinë e një ambienti të pastër, njofton kumtesa nga lëvizja, transmeton Koha.net.

Në kuadër të Fushatës “Ta Pastrojmë Kosovën”, vullnetarët e “Let’s Do It Kosova”, kanë pastruar sot katër deponi ilegale të mbeturinave në Komunën e Istogut, nga të cilat janë larguar 23 kamionë me mbeturina.

Tri nga lokacionet e pastruara kanë qenë në qytetin e Istogut, ndërsa njëra në fshatin Gurrakoc.
Aksioni është realizuar në bashkëpunim me ndërmarrjen “Ambienti” e cila përveç punëtorëve, ka ofruar edhe makinerinë e saj për largimin e mbeturinave nga deponitë ilegale.

Po ashtu, vlen të përmendet se vullnetarët e “Let’s Do It Kosova” në kuadër të fushatës “Ta Pastrojmë Kosovën” kanë realizuar disa aksione radhazi në qytetin e bukur të Istogut.

© KOHA. Të gjitha të drejtat janë të rezervuara.