“Let’s Do It Kosova” largon mbeturinat nga deponia ilegale e mbeturinave në Vushtrri

26 Tetor 2016 - 12:36      

Lëvizja mjedisore “Let’s Do It Kosova” në një aksion pastrimi, ka arritur të largojë 15 kamionë me mbeturina nga një pronë private në fshatin Patinë të Komunës së Vushtrrisë.

Aksioni është realizuar nga vullnetarët e “Let's Do It Kosova”, ndërsa ndërmarrja “Uniteti” ka ofruar makinerinë e saj për largimin e mbeturinave nga deponia ilegale e mbeturinave.

Në aksion kanë kontribuar edhe banorët e këtij fshati, të cilët janë zotuar se do ta mbajnë të pastër këtë vend.

Po ashtu, “Let's Do It Kosova” ka filluar ndërmjetësimin që fshati Patinë të bëhet pjesë e sistemit të grumbullimit të mbeturinave dhe ndërmarrja “Uniteti” të fillojë shtrirjen e shërbimit edhe në atë fshat, si masë parandaluese për krijimin e deponive të tilla të mbeturinave.

“Aksionet e tjera do të vazhdojnë që nesër, me qëllim të ngritjes së vetëdijes së qytetarëve dhe institucioneve për përgjegjësitë që kanë karshi mjedisit. Po ashtu, u bëjmë thirrje qytetarëve për mobilizim në aksione të pastrimit, në mënyrë që të gjithë së bashku të kontribuojmë në mbrojtjen e ambientit”, thuhet në njoftimin për media të kësaj lëvizjeje. 

© KOHA. Të gjitha të drejtat janë të rezervuara.