PDK e Drenasit, gjykimin e Grupit Drenica II e quan “të motivuar politikisht”

25 Tetor 2016 - 15:30      

Dega e Partisë Demokratike të Kosovës në Drenas, përmes këtij reagimi, shpreh shqetësimet ndaj rastit të dënimit në Grupin Drenica II.

PDK dega në Drenas, shpreh indinjatën me të thellë dhe shpreh pakënaqësi me rastin e dënimit të Gjykatës së Apelit ndaj grupit Drenica II, dhe mendojnë se ky vendim i kësaj gjykate “është i montuar politikisht dhe për qëllim ka denigrimin e luftës së drejtë të Ushtrisë Çlirimtare të Kosovës”.

Dega e PDK-së në Drenas thotë se nuk pajtohet me këto vendime “të qëllimshme” që kanë për objektiv “degradimin dhe njollosjen e luftës së lavdishme të UÇK-së që për synim kishte vetëm çlirimin e vendit nga regjimi serb”.

“Rasti i dënimit ndaj vëllezërve Demaku dhe të tjerëve është i motivuar nga politika dhe këto vendime plotësojnë edhe apetitet e pangopura të Serbisë e cila po vazhdon fatkeqësisht që vizuelisht të ndikoj në drejtësinë e vendit tonë, ndërsa kjo e fundit po mundohet që përmes këtyre dënimeve, pa asnjë fakt, të barazoj fajin ndërmjet luftës së Kosovës dhe atë të Serbisë”, thuhet ndër të tjera në këtë reagim.

Fatkeqësisht, Komuna e Drenasit dhe e gjithë Kosova, thotë PDK e Drenasit, ka shumë shembuj për të dhënë që “gjenocidi ndaj civilëve ishte nga paramilitarët serbë”, por përmes këtij reagimi “ne po përmendim masakrën e familjes Deliu, e cila është po nga fshati Abri, ku ishin masakruar në mënyrën me barbare edhe fëmijët e porsalindur dhe nuk është gjykuar sot e 17 vite askush për këto krime dhe asnjë krim tjetër të kryer ndaj popullatës së pafajshme të Kosovës”.

Partia Demokratike e Kosovës dega në Drenas vazhdon të besoj në luftën e drejtë dhe të pastër të Ushtrisë Çlirimtare të Kosovës. 

© KOHA. Të gjitha të drejtat janë të rezervuara.