Prindërit kërcënojnë me ndalje fëmijësh nëse zvarritet objekti shkollor

24 Tetor 2016 - 11:24      

Përfaqësuesit të Këshillit të prindërve të shkollës “Enver Maloku” të Podujevës kanë kërcënuar me ndërprerje të sërishme të mësimit po qe se deri më 1 nëntor nuk do të lëshohet objekti shkollor ku tashti është duke ndjekur mësimet Gjimnazi.

Dy ndërprerje të mësimit i kanë pasur deri tashti: njërën nga 1 shtatori deri më 19 shtator, kur pas një proteste që kishin mbajtur prindër e nxënës në këtë ditë, kishin vendosur që të hyjnë me dhunë në objektin e ri të papërfunduar e që është i dedikuar për Gjimnazin, shkruan sot “Koha Ditore”.

Por, një nga përfaqësuesit e Këshillit të prindërve, Bashkim Mustafa, thotë se pas dy ditë mësimi në atë objekt, mësimin e kishin ndërprerë edhe për 10 ditë të tjera (ndërprerja e dytë). Tashti ai thotë se janë marrë vesh me kryetarin e Komunës së Podujevës, Agim Veliu, që nxënësit të ndjekin mësimin në dy shkolla të tjera deri më 1 nëntor.

E nëse nuk ndodhë kjo, Mustafa kërcënon se do t’i ndalin sërish fëmijët e tyre nga shkolla.

(Më shumë sot lexoni sot në “Koha Ditore”)

Gazetën Koha Ditore mund ta lexoni edhe online. Këtu mund të gjeni sqarimin se si mund të abonoheni.

© KOHA. Të gjitha të drejtat janë të rezervuara.