“Echohigjiena” ngjall debat të ashpër në Kuvendin e Gjilanit [video]

20 Tetor 2016 - 19:40      

Debat të ashpër ka ngjalluar diskutimi për ndërmarrjen e pastrimit “Echohigjiena” në Kuvendin Komunal të Gjilanit, por pa ndonjë rezultat.

Derisa Komisioni i Aksionarëve i cili përfaqëson komunën në këtë ndërmarrje prezantoi raportin dhe rekomandimet për zgjidhjen e problemeve në këtë ndërmarrje, opozita deklaroi se pikërisht ky komision është një ndër fajtorët për gjendjen e krijuar në këtë kompani.

Partia Demokratike e ka quajtur këtë komision joprofesional dhe të paaftë për t’i përfaqësuar interesat komunale.

Në seancën e jashtëzakonshme që u mbajt të enjten, partitë tjera vlerësuan se patjetër duhet ofruar një zgjidhje. Por akuzat i ka mohuar kryetari i komisionit të Aksionarëve. Drejtori i zhvillimit ekonomik në këtë komunë tha se brenda muajit pritet të merret një vendim.

Kompania austriake e cila ka 51 % të aksioneve në këtë ndërmarrje “Moser Group” nuk ka marrë pjesë në debat pasi përfaqësuesi i saj ndodhet jashtë vendit.

Ndërkohë drejtori ekzekutiv Senad Ramaj, ndodhet në arrest shtëpiak nën akuzat për keqpërdorim të detyrës zyrtare, porse vazhdon ti mohojë ato.

© KOHA. Të gjitha të drejtat janë të rezervuara.