Bie interesimi për blerje të drurëve dhe qymyrit për ngrohje

19 Tetor 2016 - 11:21      

Ka rënë interesimi për blerje të drurëve e qymyrit për ngrohje gjatë dimrit. Kështu thonë shitësit e këtyre lëndëve për ngrohje, edhe pse ata nuk i dinë arsyet e kësaj.

Një metër kub qymyr shitet me çmim prej 25 euro në Prishtinë, përderisa një metër dru nga 40 deri në 45 euro.

Por, shitësit e qymyrit shprehen se sivjet kanë shitje më pak se vitin e kaluar, raporton televizioni publik.

Se sivjet kanë më pak shitje se vitin e kaluar, ankohen edhe shitësit e drurëve për ngrohje.

Shitësit e këtyre lëndëve nuk i dinë arsyet e rënies së shitjeve sivjet, por aludojnë në përmirësimin e rrjetit të ngrohtores së qytetit.

Qytetarët ankohen se zakonisht bëhen mashtrime nga shitësit e drurëve, pasi një metër dru për ngrohje zakonisht del më pak se sa e sheshin tregtarët.

Mirëpo shitësit thonë se metri është i saktë kur blihet me metër kub, por nuk është i saktë në rastet kur blihet refuz, me kamion, atëherë kur edhe qytetarët shtyhen për çmim më të ulët.