I ndërpritet marrëdhënia e punës zyrtarit të dënuar për vepër penale

13 Tetor 2016 - 12:40      

Komuna e Rahovecit ka njoftuar se kryetari Idriz Vehapi ia ka ndërprerë marrëdhënien e punës shefit të Zyrës komunale për komunitete dhe kthim, për arsye se ky nëpunës është dënuar me vendim të plotfuqishëm gjyqësor për kryerjen e veprës penale të keqpërdorimit seksual të personit nën moshën 16-vjeçare. Sipas njoftimit të Zyrës për Informim, Vehapi e ka nënshkruar këtë vendim afër dy javë më parë, shkruan sot Koha Ditore.

"Me datë 29 shtator 2016, kryetari i Komunës së Rahovecit, Idriz Vehapi, ka nënshkruar vendimin për ndërprerjen e marrëdhënies së punës për Sllavisha Kollashinacin, shef i Zyrës Komunale për Komunitete dhe Kthim në Komunën e Rahovecit. Vepra penale për të cilën është dënuar Sllavisha Kollashinac, është keqpërdorim seksual i personave nën moshën gjashtëmbëdhjetë vjeç", thuhet në komunikatën e ZI-së, shkruan sot më gjerësisht Koha Ditore.

Gazetën Koha Ditore mund ta lexoni edhe online. Këtu mund të gjeni sqarimin se si mund të abonoheni.

© KOHA. Të gjitha të drejtat janë të rezervuara.