Busti i Azem Galicës vendoset në fshatin e tij të lindjes

12 Tetor 2016 - 17:59      

Sot në oborrin e shkollës fillore të fshatit Galicë të Vushtrrisë, e cila mban emrin e Azem Galicës, u vendos busti i këtij tribuni popullor.

Në ceremoninë e vendosjes ishte edhe kryetari i Kuvendit të Kosovës Kadri Veseli, njofton kumtesa e Kuvendit, transmeton Koha.net.

Në fjalën e tij para nxënësve dhe mësimdhënësve të kësaj shkolle, si dhe banorëve të fshatit Galicë e të fshatrave përreth, Veseli vlerësoi lart figurën markante të luftëtarit dhe udhëheqësit të shquar të rezistencës shqiptare kundër pushtuesve të ndryshëm, Azem Galicës, i cili, ndër dekada, u bë frymëzim për gjenerata dhe breza luftëtarësh e veprimtarësh të çështjes kombëtare.

“Kjo shkollë mban një emër të madh, emrin e Azem Bejtes, njërit prej themeluesve të Lëvizjes Sonë Kombëtare për çlirimin e Kosovës. Azem Bejta flijoj gjithçka që ne të jemi të lirë në tokën tonë, t’i kemi shkollat tona, të jetojmë me dinjitet si të gjithë popujt e lirë. Sot ne ndihemi krenar dhe qëndrojmë ballëhapur para bustit të tij, sepse amaneti i tij është përmbushur”, tha Veseli.

Duke iu drejtuar nxënësve, kryetari i Kuvendit shtoi se ata nuk duhet të harrojnë asnjëherë prej nga vijnë dhe cilit popull i takojnë.

© KOHA. Të gjitha të drejtat janë të rezervuara.