Komuna e Prishtinës lidh marrëveshje me Rrjetin e Kosovës për Arsim dhe Punësim

24 Janar 2017 - 15:59      

Kryetari i Komunës së Prishtinës, Shpend Ahmeti, nënshkroi sot marrëveshjen e bashkëpunimit në mes të Komunës së Prishtinës dhe Rrjetit të Kosovës për Arsim dhe Punësim, të përfaqësuar nga Kushtrim Bajrami, bëhet e ditur përmes një njoftimi për medie nga Zyra për Marrëdhënie me Media të Komunës së Prishtinës.

Marrëveshja synon hartimin e planit pesëvjeçar për arsim në Prishtinë, 2017-2021. Ky plan do të hartohet nga një ekip i specializuar, i përbërë nga zyrtarët komunalë përgjegjës për arsim, përfaqësues nga Kuvendi Komunal dhe përfaqësues të tjerë nga komuniteti shkollor dhe grupet e tjera të interesit.

Në këtë mënyrë, Komuna e Prishtinës dhe organizatat e shoqërisë civile do të angazhohen së bashku për një dialog kuptimplotë me synim përmirësimin dhe pjesëmarrjen e shoqërisë civile në procesin e zhvillimit të politikave.