Për 7 ditë u mblodhën ndihma për 200 familje të komunës së Prishtinës

16 Janar 2017 - 11:06      

Iniciativa e nisur me datë 9 janar 2017 për të ndihmuar familjet në nevojë për rajonin e Prishtinës ka përfunduar dje, më 15 janar, njofton sot #PrishtinaNdihmon. Fillimisht kjo iniciativë ishte planifikuar të zgjaste për dy ditë, por pas kërkesave të shumta të qytetarëve për të kontribuar me veshmbathje dhe ushqim për familjet në nevojë, aksioni vazhdoi edhe për 5 ditë të tjera.

Gjatë këtyre ditëve u janë shpërndarë ndihma në më shumë se 200 familje në Prishtinë dhe komunat të tjera të afërta, transmeton Koha.net. Secila nga këto familje ka marrë veshmbathje dhe pako ushqimore, thuhet në njoftim. Pakot ushqimore përbëheshin nga: miell, vaj, qumësht, kripë, sheqer, oriz, fasule, patate, qepë, makarona, çaj, djathë etj.

Fillimisht pjesë e grupit iniciues ishin vetëm 6 të rinj, por aksionit i është bashkuar një numër i madh i vullnetarëve, të cilët kanë ndihmuar për mbledhjen dhe transportimin e pakove.

#PrishtinaNdihmon planifikon të vazhdojë me aksione humanitare edhe në të ardhmen e afërt, përfundon njoftimi.

© KOHA. Të gjitha të drejtat janë të rezervuara.