Ministria injoron kërkesën e Komunës së Prishtinës për më shumë pediatër në QMF [video]

13 Janar 2017 - 21:49      

Fëmijët, të cilët deri tash merrnin drejtpërsëdrejti shërbimin pediatrik në disa prej qendrave të mjekësisë familjare në Prishtinë, tash nuk do ta marrin më.

Komuna e Prishtinës, që nga fillimi i këtij viti, sipas sistemit të referimit, ka vendosur që të gjitha grupmoshat e fëmijëve fillimisht t’i trajtojë mjeku familjar, raporton KTV.

Por ky ndryshim pritet të shtojë fluksin e madh të pacientëve e i cili edhe pa këtë referim ishte tejet i lartë.

Megjithatë, respektimi i sistemit të referimit do ta shkarkojë punën e shërbimit pediatrik, i cili tash e tutje do të merret vetëm me rastet specifike.

Kryetari i Komunës së Prishtinës, Shpend Ahmeti, thotë se u detyrua të marrë një vendim të tillë pasi Ministria e Shëndetësisë nuk i përfilli kërkesat për rritjen e numrit të pediatërve.

Nga ana tjetër, zyrtarët e Ministrisë së Shëndetësisë nuk kanë dhënë asnjë sqarim lidhur me kërkesat e Komunës së Prishtinës.

Derisa vetëm ua ka rikujtuar profesionistëve shëndetësorë se dhënia e shërbimeve mjekësore për fëmijë është në kompetencë profesionale të mjekëve familjarë, të cilët do të vlerësojnë se a ka nevojë për ndonjë tretman tjetër specialisti apo trajtimi mund të bëhet nga specialisti i mjekësisë familjare.

Ministria injoron kërkesën e Komunës së... by kohanet

© KOHA. Të gjitha të drejtat janë të rezervuara.