Prishtina në alarm për ndotjen e ajrit [video]

9 Dhjetor 2016 - 19:40      

Niveli i ndotjes së ajrit në Prishtinë është shumë i madh. Madje, mbajtja e maskave është bërë e domosdoshme.

Përveç njerëzve, në Prishtinë maska u është vendosur edhe disa kukullave. Kjo është bërë nga organizata PEN dhe Lëvizja Shkenca për Ndryshim, të cilat kanë zhvilluar aksione kundër ndotjes së ajrit, raporton KTV.

Kukullat me maska dhe me mbishkrime sensibilizuese kundër ndotjes së ajrit janë vendosur në disa nga sheshet e Prishtinës dhe para Ministrisë së Mjedisit.

Qytetarët thonë se është e papranueshme mospërgjegjësia e institucioneve karshi kësaj dukurie shqetësuese.

E në Ministrinë e Mjedisit thonë se me vëmendje është duke u ndjekur gjendja e ajrit në Kosovë, gjatë ditëve të fundit dhe se përkitazi me situatën është shtuar edhe gatishmëria për marrjen e masave dhe për përmirësimin e gjendjes.

MMPH-ja gjithashtu iu bën apel edhe qytetarëve që gjatë këtyre ditëve të jenë më të kujdesshëm, sidomos në përdorimin e automjeteve për transport.

Ndërkaq, organizata PEN dhe Lëvizja Shkenca për Ndryshim do të vazhdojnë që të hulumtojnë ndotjen e ajrit në Prishtinë dhe do të vazhdojnë aktivitetet edhe ditët e ardhshme.

Prishtina në alarm për ndotjen e ajrit [video] by kohanet

© KOHA. Të gjitha të drejtat janë të rezervuara.