Kaos, as pas dy muajsh riasfaltim në “Luan Haradinaj” s’ka shenja [video]

3 Dhjetor 2016 - 10:57      

Edhe pse është në qendër të qytetit dhe ka rreth dy muaj që është riasfaltuar, në rrugën “Luan Haradinaj” nuk ka asnjë vijë.

Nuk janë shenjëzuar as vendkalimet e këmbësorëve, as vijat ndarëse të shiritave të lëvizjes, e as shenja tjera të nevojshme, raporton “038” i KTV-së.

Kjo mungesë, pos kaosit, ka bërë që këmbësorët të orientohen vetëm në bazë të uljes së trotuareve.

Kjo situatë nuk është e lehtë as për shoferët, që në këto rrethana duhet të lëvizin me kujdes të shtuar.

Në komunë pa dhënë ndonjë afat kohor, kanë premtuar se shenjëzimi do të bëhet shumë shpejt.

E për shkak të punimeve në trotuarin e papërfunduar në këtë rrugë, problem është edhe ndriçimi, për të cilin po ashtu në komunë thonë se do të përfundojë shumë shpejt.

Ndryshe, javë më parë, Lidhja Demokratike e Kosovës kishte kritikuar ashpër ekzekutivin në Prishtinë për mos-shenjëzimin e rrugëve në kryeqytet.

© KOHA. Të gjitha të drejtat janë të rezervuara.