LDK: Qeverisja Ahmeti për tre vjet s’ka nisur asnjë objekt shkollor

16 Nëntor 2016 - 14:34      

Grupi i këshilltarëve të LDK-së në Kuvendin e Komunës së Prishtinës ka vlerësuar se mungesa e objekteve shkollore në Kalabri, Vetërrnik, Mat, Sofali dhe Arbëri, tek Përroi i Njelmët dhe në lagje të tjera të kryeqytetit ka shkaktuar rritjen e numrit të nxënësve në SHFMU “Hasan Prishtina”, “Ismail Qemaili”, “Faik Konica”, “Meto Bajraktari”, “Dardania” dhe disa institucione tjera të këtij niveli shkollor.

Kjo, sipas LDK-së së Prishtinës, po ndodh sepse Komuna e Prishtinës në tri vitet e fundit nuk ka filluar të ndërtojë asnjë objekt shkollor, përkundër planifikimit të përvjetshëm dhe mundësisë potenciale që i ka për financimin e ndërtimit të kësaj infrastrukture.

“Drejtoria Komunale e Arsimit e Komunës së Prishtinës për çdo vit po përpiqet të promovojë mësimin gjithëditor në të njëjtat institucione, ku mësimi zhvillohet në dy ndërrime, ku mungon infrastruktura elementare, ku nxënësit nuk i janë krijuar kushtet e domosdoshme të qëndrimit gjatë gjithë orarit të mësimit gjithëditor në mënyrë që të ndjehet si në ambientin familjar ku ai do të mund të ushqehet, të argëtohet e të zhvillojë aktivitete në fusha të ndryshme mësimore dhe ku ai, përpos mësimit bazik, të mund të përfitojë nga programet e fushave të ndryshme”, thuhet në reagimin e LDK-së së Prishtinës.

Se çfarë pasojash ka shkaktuar mosrealizimi i planifikimit të përvjetshëm në infrastrukturën shkollore nga qeveria komunale e Komunës së Prishtinës, sipas LDK-së, “mund të shohim pamjet përreth shkollave kur nxënësit shkojnë në mësim dhe kur ata lëshohen nga mësimi”.

“Përreth objekteve shkollore po krijohet kaos nga veturat dhe transporti i organizuar për të sjellë fëmijët dhe për t’i kthyer ata në shtëpitë e tyre nga lagjet ku mungojnë objektet shkollore. Po ashtu, kjo gjendje ka ndikuar dukshëm që, në këto institucione, të rritet numri i nxënësve dhe të ndikojë që mësimi të zhvillohet në dy e më shumë ndërrime. Kjo po ndikon që të ngushtohet hapësira shkollore për kokë nxënësi gjë që automatikisht ndikon në pengimin e ngritjes së cilësisë në mësime”, theksohet më tej në reagim.

LDK thotë se qasja me gjakftohtësi në këtë fushë e qeverisë komunale në Prishtinë dhe mos vënia në prioritet e ndërtimit të objekteve shkollore në politikën zhvillimore tregon se “sa e kanë dëmtuar arsimin e Prishtinës politikat e Shpend Ahmetit dhe Vetëvendosjes në këto tri vitet e qeverisjes së tyre”.

“Jo vetëm kaq, por ka edhe shumë anomali tjera, të cilat nuk ishin pjesë e premtimeve të tyre në kohë fushate, por që tani duke qenë pjesë e politikave qeverisëse po dëshmojnë se shkollat e Prishtinës janë shndërruar në institucione ku punësohen militantët e VV-së, ku po bëhen spastrime politike dhe po zgjedhen drejtorë të anëtarësuar në VV, ose janë në lidhje të ngushta me rrjetin e militantëve të VV-së, ku punësohen mësimdhënës, kryesisht nga Gjakova dhe komuna tjera anembanë Kosovës si anëtarë të VV-së e më së paku të Prishtinës”, përfundon reagimi i Grupit të këshilltarëve të LDK-së në Kuvendin e Komunës së Prishtinës. 

© KOHA. Të gjitha të drejtat janë të rezervuara.