Për 100 nxënës të Prishtinës, mësimi pa pagesë i gjuhëve të huaja

4 Nëntor 2016 - 14:05      

Kryetari i Prishtinës Shpend Ahmeti, përmes Facebookut, ka bërë me dije se komuna që ai udhëheq do të ndihmojë 100 nxënës nga kategori të ndryshme sociale t’i ndjekin pa pagesë kurset e gjuhëve të huaja, transmeton Koha.net.

100 nxënës nga familjet me gjendje të rëndë ekonomike, familjet e kategorive të luftës,të rinj të papunë dhe të rinj me sukses të dalluar do të vijojnë kurse të gjuhëve të huaja pa pagesë, ka shkruar Ahmeti.

Prefekti i Prishtinës ka njoftuar se “dje nënshkruam marrëveshjen tripalëshe të bashkëpunimit në mes Komunës së Prishtinës, Ndërmarrjes Publike Banesore dhe shkollës për kurse të gjuhëve të huaja "New Age School".

Qëllimi i kësaj marrëveshjeje është që "New Age School" të pranojë 100 nxënës nga familjet me gjendje të rëndë ekonomike, familjet e kategorive të luftës, të rinj të papunë dhe të rinj me sukses të dalluar, në kurse të gjuhëve të huaj pa pagesë, ka thënë ai.

Komuna e Prishtinës do të bëjë identifikimin e këtyre të rinjve, ndërsa Ndërmarrja Publike Banesore do të zbatojë një zbritje prej 50% në qira, ndaj "New Age School", si shfrytëzues të objektit me qira, ka shtuar Ahmeti dhe ka përfunduar se komuna e Prishtinës mbetet me shpresë se iniciativa si kjo që ndihmojnë kategoritë më të rrezikuara do të përsëriten edhe me ndërmarrës të tjerë në Komunën e Prishtinës.

© KOHA