Gjimnazistët e “Sami Frashërit” s’duan që emri i shkollës të ndërrohet në “Ahmet Gashi” [video]

29 Tetor 2016 - 18:07      

Ndonëse para tre vjetësh ishin regjistruar në Gjimnazin “Sami Frashëri”, këta maturantë do të dalin të diplomuar nga gjimnazi “Ahmet Gashi”.

Gjimnazi shoqëror dhe ai natyror deri këtë vit mbanin të njëjtin emër, ndonëse në objekte të ndara, raporton “038” i KTV-së.

Era Hoxha, e cila këtë vit mbaron gjimnazin, thotë se ende ndihet pjesë e “ Sami Frashërit”, pavarësisht ndryshimit të emrit.

Kjo për faktin se sipas Hoxhës, ata ende mbajnë uniformat e njëjta, për dallim nga gjeneratat e tjera në këtë shkollë.

Por ndryshimi i emrit ka ngjallur pakënaqësi te nxënësit e tjerë, të cilët thonë se është dashur të merret parasysh edhe mendimi i tyre.

Ajo çka gjimnazistët kanë pëlqyer është ndërrimi i uniformës.

Drejtori i këtij gjimnazi është i sigurt se do të mbajnë cilësinë e mësimit dhe traditës ashtu sikurse ka qenë gjithmonë.

Një ndër arsyet pse është bërë kjo ndarje thotë se ka qenë numri i madh i nxënësve.

Reçica pranon se ka pasur zëra se nuk do të ketë interesim të nxënësve për këtë gjimnaz, por sipas tij, kjo nuk do të ndodhë.

Ministria e Arsimit qysh në vitin 2013 kishte marrë vendim që të bëhet ndarja e gjimnazeve për shkak të numrit të madh të nxënësve dhe rritjes së cilësisë.

Ndarja u bë këtë vit në realitet dhe gjimnazi “Sami Frashëri 2” mori emrin e historianit dhe gjeografit shqiptar “Ahmet Gashi”.

© KOHA. Të gjitha të drejtat janë të rezervuara.