Komuna e Prishtinës shpërfill vendimin e Themelores në lidhje me një rast social [video]

21 Tetor 2016 - 23:13      

Komuna e Prishtinës nuk është duke e zbatuar vendimin e plotfuqishëm të Gjykatës për kthim në rivendosje dhe rishqyrtim të një rasti për dhënien në shfrytëzim me qira të banesave për familjet me përkujdesje sociale. Familja Syla thotë se nëse komuna nuk iu bën zgjidhje, ata do të mbesin në rrugë.

4 vjet më parë, u refuzua kërkesa e tyre për shfrytëzimin me qira të njërës prej banesave për familjet me përkujdesje sociale në Fushën e Pajtimit.

Pas kësaj, Shemsije dhe Zimer Syla e paditën komunën, duke kërkuar anulimin e vendimit dhe kthim të çështjes në rishqyrtim dhe rivendosje, raporton “038” i KTV-së.

Tani ata kanë një vendim të plotfuqishëm në favor të tyre. Por, thonë se Komuna nuk po e zbaton atë.

Ndërsa, shtojnë se shtëpia ku ata jetojnë tash e 17 vjet, nuk është pronë e tyre dhe se pronari i ka paralajmëruar se do t’i largojë nga aty.

“Në vitin 2012 kemi apliku, na kanë refuzu gjoja se ne kemi para, e ne jemi në shtëpi të huaj edhe jemi të sëmurë, të paaftë. Gjykatat e kanë kthy pozitiv, komuna nuk po e pranon”.

Kryefamiljari, Zimer Syla, i cili ka edhe probleme shëndetësore, është i mllefosur nga moszbatimi i vendimit të gjykatës nga komuna e Prishtinës.

Ndërkohë, në Komunën e Prishtinës, as pas dy javësh pritjeje, nuk kanë dhënë asnjë përgjigje lidhur me këtë çështje.

Ndryshe, kjo familje që jeton vetëm me asistencë sociale, kërkon nga komuna që të zbatojnë vendimin e gjykatës dhe t’u bëjë një zgjidhje, pasi sipas tyre, ata nuk kanë pronë tjetër dhe rrezikojnë të mbesin në rrugë.

© KOHA. Të gjitha të drejtat janë të rezervuara.