Fermerit nga Prishtina i ngordhin gjedhet nga një sëmundje misterioze [video]

3 Tetor 2016 - 22:06      

Pas një viti kur vendosi që me mjete vetanake të ndërtojë stallën dhe të shtojë numrin e gjedheve, Halim Vitisë nga Marevci i Prishtinës gjërat po i shkojnë ters.

Të hënën, atij i ngordhën dy lopë që thotë të kenë qenë të racës më të mirë. Kjo është hera e dytë që Halimit i ngordhin lopët. Gjendjen e bënë edhe më të rëndë për të, pasi të gjitha gjedhet e ngordhura ishin të mbarësuara, raporton KTV.

Halimi thotë se për shkak të frikës ka mbajtur të mbyllur pjesën tjetër të kopesë, por frika më e madhe e tij është te familja.

Ai që nga mëngjesi thotë të mos ketë lënë asnjë institucion pa telefonuar për t’u kërkuar ndihmë në largimin e dy lopëve të ngordhura, pasi qëndrimi i tyre në oborr vetëm sa rriste frikën për shëndetin e familjarëve të tij.

Gjatë mesditës, Halimi u vizitua nga Policia e Kosovës, e cila edhe ka bërë kontrollimin e kodrës ku së fundi janë ushqyer lopët, por kanë thënë të mos kenë gjetur ndonjë gjë të dyshimtë.

Herën e parë kur i ngordhën lopët, Agjencia e Ushqimit dhe Veterinës kishte dyshuar në sëmundjen antraks, por analizat kishin treguar të kundërtën, por deri më tani kjo agjenci nuk ka arritur të gjejë shkaktarin ngordhjes së lopëve të Halimit. 

© KOHA. Të gjitha të drejtat janë të rezervuara.