Kuvendi i Prishtinës po diskuton për buxhetin, për kulurën simbolikisht

29 Shtator 2016 - 11:20      

(E plotësuar) Rreth një orë diskutimi për ndryshim të rendit të ditës në mbledhjen e pestë të Kuvendit Komunal të Prishtinës, deri më tani janë kaluar tri pika të rendit të ditës, ndërsa aktualisht po diskutohet për pikën e propozimvendimit për miratimin e buxhetit të Komunës së Prishtinës për vitin 2017.

Qeveria e Kosovës ka ndarë 62 milionë euro për këtë Komunë.

Lidhur me këtë, kanë reaguar asamblistë komunal, sipas të cilëve buxheti për fushën e kulturës është simbolik, transmeton KP.

Madje, sipas asamblistëve të LDK-së e PDK-së, në këtë buxhet nuk janë përfshirë investime kapitale në fushën e kulturës.

Lirak Çelaj nga PDK tha se nëse pushteti aktual është duke u dorëzuar, atëherë le të tërhiqen e mos ta mbajnë peng Prishtinën.

Kërkesa për ndryshim të rendit të ditës, bllokon seancën e Kuvendit të Prishtinës

Ka nisur mbledhja e pestë e Kuvendit Komunal të Prishtinës, së cilës nga sot iu shtua anëtari i ri i Kuvendit, Fisnik Osmani nga LDK, në zëvendësim të Sami Hamitit.

Që në fillim të mbledhjes u kërkua zëvendësim në pikat e rendit të ditës nga anëtari Ibrahim Mehmeti nga AAK, propozimi u përkrah nga Vetëvendosje, por jo edhe nga anëtarët e LDK-së dhe PDK-së. Propozimi parashihte që para pikës së parë për buxhet dhe financa të kalohej në tema të tjera.

Lirak Çelaj nga PDK tha se Vetëvendosje me këto propozime po tregon qartë se kush deri sot po e bllokon punën e kuvendarëve.

"Ne si Komitet për Politikë dhe Financa, jemi marrë vesh që të diskutojmë për ndërmarrjet publike dhe këto përpjeke për të bërë lojëra të tilla janë të dëmshme për qytetarin e Prishtinës, por tash veç dihet kush po i bënë këto lojëra", tha Çelaj.

Edhe anëtari tjetër i opozitës në Kuvendin Komunal të Prishtinës, Shefki Gashi nga LDK, tha se dikush po dëshiron që të bëjë mjegull në këtë situatë që gjendet Komuna dhe po organizojnë mbledhje vetëm për përfitime të tyre.

Meqë situata vazhdoi me debate për dhe kundër ndryshimit të rendit të ditës, Ibrahim Mehmeti që propozoi ndryshimin e rendit të ditës kërkoi që pika e 11-të të dalë si pikë e tretë e rendit të ditës, ndërsa dy pikat e tjera të mos ndryshohen.

Pasi u hodh në votim ky propozim, pika e 11-të nuk doli në rendin e tretë të ditës për arsye të mungesës së votave të mjaftueshme.