Komuna e Prishtinës liron hapësirën e uzurpuar publike në dy raste

9 Gusht 2016 - 11:01      

Drejtoria e Inspeksionit në Komunën e Prishtinës, sektori i Rendit Komunal, ka ndërmarrë dy aksione të tjera që kanë të bëjnë me lirimin e hapësirës publike si dhe rrënimin e ndërtimeve pa leje.

“Me inspektimet e përditshme në terren, inspektorët kanë konstatuar se në rrugën “Nazim Gafurri”, një lokal ka shtuar pa leje një pjesë të objektit. Rasti tjetër ka të bëjë me shtrim të asfaltit në hapësirë publike, pa poseduar leje nga organi kompetent, duke dëmtuar kështu hapësirën e gjelbëruar”, thuhet në njoftimin e Komunës, raporton Koha.net.

Në të dy rastet, Inspektorët e Rendit Komunal, sipas njoftimit, kanë urdhëruar paraprakisht palët që t’i heqin të gjitha shtesat pa leje.

“Meqë një gjë e tillë nuk ka ndodhur, Drejtoria e Inspeksionit është detyruar që të intervenojë, duke e rrënuar kështu shtesën pa leje në objekt, si dhe duke liruar hapësirë publike për gjelbërim”, potencohet në njoftim. 

© KOHA. Të gjitha të drejtat janë të rezervuara.