Ujësjellësi “Prishtina” apelon për shlyerjen e borxheve

9 Gusht 2016 - 09:25      

Prishtinë, 9 gusht - Kompania e ujësjellësit rajonal “Prishtina”, të hënën, nëpërmjet një njoftimi publik, ka kërkuar nga konsumatorët e komunave: Prishtinë, Fushë-Kosovë, Podujevë, Shtime, Lipjan, Graçanicë, Drenas dhe Obiliq që ta shfrytëzojnë afatin ligjor për shlyerjen e borxheve nga vitit 1999 deri më 2008. Afati ligjor për aplikim mbaron më 2 shtator, shkruan sot Koha Ditore.

“Duke filluar nga muaji nëntor 2015, ka filluar me pranimin dhe menaxhimin e kërkesave (të secilit konsumator veç e veç) dhe me zbatimin e Ligjit për faljen e borxheve, i cili vlen vetëm edhe 24 ditë, deri më 2 shtator 2016”, thuhet në komunikatë. Sipas saj, nga falja do të përfitojnë të gjithë konsumatorët e tetë komunave , ata të cilët kanë obligime të pashlyera ndaj shërbimeve të këtij institucioni, me kusht që borxhet nga data 1 janar 2009 e deri më 31 dhjetor 2014 të paguhen (bazuar në Ligjin për faljen e borxheve publike).

“Ju që do të përfitoni nga falja e borxheve të shërbimeve të ujësjellësit dhe kanalizimit (amvisëri e biznese) për periudhën deri më 31 dhjetor 2008, nëse lidhni marrëveshje me KUR ”Prishtina”sh.a. për riprogramim borxhi dhe nuk i përmbaheni në përpikëri kësaj marrëveshjeje, atëherë ne obligohemi që t’ju vendosim sërish në listën e borxheve, duke iu bërë obligues për të gjitha borxhet deri më 31 dhjetor 2008, çdoherë duke u bazuar në Ligjin për faljen e borxheve publike”, thuhet në komunikatën e KUR “Prishtina”.

Sipas të dhënave të bëra publike javë më parë, kjo kompani ka bërë të ditur se konsumatorëve do t`iu falet një borxh prej 23 milionë eurosh. Deri në këtë fazë janë falur mbi 5 milionë euro borxhe.

Sipas komunikatës zyrtare të kësaj kompanie, konsumatorët borxhlinj që e humbin këtë rast do të përballen me: shkyçje nga rrjeti i furnizimit me ujë, faturimin e shërbimit të vërejtjeve dhe shkyçjes-rikyçjes, padi gjyqësore, si dhe arkëtim të dhunshëm përmes përmbaruesve privatë.

KUR “Prishtina” ka bërë të ditur se procedurat e rregullimit të borxheve bëhen në zyrat e selisë qendrore në Prishtinë dhe në zyrat e ndërmarrjes në komunat: Fushë-Kosovë, Obiliq, Podujevë, Drenas, Shtime, Graçanicë dhe Lipjan.
Të njëjtën ditë edhe Ministria e Financave , nëpërmjet një njoftimi publik ka ftuara qytetarët që ta shfrytëzojnë afatin ligjor për t`i shlyer borxhet.

“Me këtë Ligj përfitojnë të gjithë personat, të cilët kanë obligime të pashlyera ndaj Institucioneve Shtetërore dhe Kompanive Publike në Kosovë”, thuhet në komunikatë.

© KOHA. Të gjitha të drejtat janë të rezervuara.