Komuna i cilëson ilegale grafitet e reja në Rrugën B të kryeqytetit

3 Gusht 2016 - 10:30      

Prishtinë, 3 gusht - Një pjesë e murit prej betoni në Rrugën B tashmë është mbuluar me grafite. Forma të ndryshme artistike kanë zënë vend në këtë pjesë, duke i dhënë një pamje tjetër. Iniciator i kësaj nisme ka qenë Ardin Badiviku.

Në kuadër të edicionit të parë të festivalit “P+”, i cili është mbajtur prej 21 deri më 23 korrik, me qëllim të “shkrirjes” së muzikës, teknologjisë dhe artit në një vend, ai thotë se realizimin e grafiteve e ka bërë me pëlqim të Komunës së Prishtinës, shkruan sot Koha Ditore.

Dymbëdhjetë artistë janë bërë bashkë në shpalosjen e talentit të tyre në artin e rrugës, i cili rëndom është ilegal. Thotë se miratimin ia ka dhënë tashmë ish-drejtoresha e Departamentit të Kulturës, Rinisë dhe Sportit në Komunën e Prishtinës. Por nuk e ka të shkruar në letër. Është mjaftuar me konfirmim nëpërmjet telefonit.

Në anën tjetër, zyrtarë komunalë thonë se ky veprim është bërë pa leje.
“Fondi prej 50 mijë eurosh është paraparë të ndahet nga Drejtoria e Kulturës me një konkurs për murale në hapësira publike. Deri më tash ende nuk është hapur konkursi dhe asnjë mural nuk ka leje, qofshin ato vizatime apo reklama”, ka thënë Erzen Vraniqi (gjerësisht, sot në “Kohën Ditore”).

Gazetën Koha Ditore mund ta lexoni edhe online. Këtu mund të gjeni sqarimin se si mund të abonoheni.

© KOHA. Të gjitha të drejtat janë të rezervuara.