Imazhi i ISIS-it, Lavdrim Muhaxheri [video]

1 Shtator 2015 - 18:01      

Xhihadisti famëkeq kosovar, Lavdrim Muhaxheri është paraqitur në një video propaganduese të ISIS-it pak më qetë krahasuar me paraqitjet paraprake. Ai ka promovuar monedhën e re të organizatës terroriste.

Si shumica e videove tjera propagandistike të organizatës terroriste, Shteti Islamik, videoja e publikuar të hënën ka produksion të shkëlqyeshëm, raporton KTV.

E këtë herë ISIS-i ka reklamuar monedhën e re të cilën filloi ta prodhonte. Fytyra promovuese e reklamës është xhihadisti kosovar, Lavdrim Muahxheri.

Muhaxheri, i cili ka vite që i është bashkuar ISIS-it dhe që njihet për mizoritë e tij, tashmë është promovuar nga ISIS si njeriu i imazhit, derisa në video qytetarëve të Mosulit ua paraqiste monedhën e re.

Muhaxheri kishte shkaktuar neveri korrikun e vitit të shkuar kur postoi disa fotografi në Facebook, ku shihej duke i hequr kokën një njeriu.

E dramatizuar nga pjesë të filmave holivudian të luftës, në video ISIS-i akuzon SHBA-në për konfiskimin e pasurisë së vërtetë amerikane përmes dekretit ekzekutiv, me prezantimin e Aktit për Rezervat e Arta nga viti 1934.

Por pavarësisht glorifikimit që i kanë bërë monedhës, ISIS-i vazhdon të paguajë xhihadistët e vet me dollarë.

Për më tepër, kompania amerikane “Bloomberg”, thotë se monedha nuk ka asnjë gjasë të tregtohet jashtë territorit të kontrolluar nga grupi militant dhe promovimi i saj është më shumë fushatë propagandistike.

Dinari i artë i ISIS-it ka 21-karatë dhe me peshën prej 4.25 gramësh është i barabartë me 139 dollarë amerikanë.  

© KOHA. Të gjitha të drejtat janë të rezervuara.