Haradinaj: Beteja e Kosharës, lavdia e zhbërjes së kufirit të padrejtë

9 Prill 2015 - 09:55      

Kreu i AAK-së, Ramush Haradinaj, ish komandant në Dukagjin, ka thënë se kujton me respektin më të lartë, sot, në 16-vjetorin e saj, Betejën e lavdishme të Koshares, heronjtë Agim Ramadani, Sali Çeku dhe 112 dëshmorët tjerë, që me guximin dhe gjakun e tyre shënuan njërën prej ngjarjeve më të rëndësishme të luftës së Ushtrisë Çlirimtare të Kosovës.

“Manifestimi tradicional ‘Ditët e Shqipes’, që nis sot, risjellë lavdinë e kësaj ngjarjeje dhe përmbushë veç njërin prej obligimeve tonë në nderim të sakrificës së bijave dhe bijve më të mirë të kombit, për lirinë dhe shtetin që po e ndërtojmë”, ka thënë Haradinaj.

“Beteja e Koshares, një nga ngjarjet e luftës sonë për liri, kujtohet si një prej betejave më të suksesshme të UÇK-së, ku u zhbë, për herë të parë, kufiri i padrejtësisë së madhe midis shqiptarëve, në kapitullin përfundimtar dhe vendimtar të luftës sonë për liri”, ka shtuar më pas ai.

© KOHA