Rezoluta për FAK-un nuk tregon se a do të ketë Kosova Ushtri [video]

15 Shkurt 2017 - 19:10      

Rezoluta e Kuvendit për krijimin e Forcave të Armatosura të Kosovës nuk përcakton kohën e as që thotë se Kosova do të ketë ushtri. Kjo të paktën jo deri në sigurimin e votave të minoritetit serb, raporton KTV.

Në fund të debatit, deputetët, në emër të harmonizimit të saj, modifikuan pikën 1 të rezolutës, duke hequr 1 marsin si përcaktim kohor kur qeveria detyrohet ta dërgojë në Kuvend ligjin për avancimin e Forcës e po ashtu hoqën edhe fjalën ligj, duke e zëvendësuar atë më fjalën strategji.

Nga rezoluta e Komisionit u fshi edhe komplet pika 2, e cila në fakt fliste për atë se çfarë misioni do të duhej të bëhej forca.
Rexhep Selimi thotë se me heqjen e kësaj pike, rezoluta e miratuar në Kuvend ishte vetëm sa për të arsyetuar debatin e zhvilluar dhe se nuk është bërë asnjë hap tutje drejt krijimit të ushtrisë.

Argumenti që përdorën partitë në pushtet për të mos shkuar tutje që ushtrinë ta bëjnë përmes ligjit, ishte se ka indikacione që NATO-ja nuk do ta mbështesë ushtrinë e Kosovës pa votat e serbëve.
Kosova humbi një shans të tillë në vitin 2014, pasi LDK-ja dhe Vetëvendosje nuk pranuan zgjatjen e mandatit të vendeve të rezervuara në këmbim të votave serbe.

Rezoluta për FAK-un nuk tregon se a do të ketë... by kohanet

© KOHA. Të gjitha të drejtat janë të rezervuara.