Gazetarët e Kosovës dhe të Serbisë, të zhgënjyer me institucionet e drejtësisë

15 Shkurt 2017 - 14:50      

Asociacioni i Gazetarëve të Kosovës (AGK), bashkërisht me Asociacionin e Gazetarëve të Serbisë (UNS) kanë shprehur zhgënjimin e tyre me institucionet e drejtësisë në Kosovë për mospjesëmarrje në konferencën regjionale për sigurinë e gazetarëve që u mbajt dje në Prishtinë.

Siç është theksuar tashmë në shumë raporte dhe tryeza, institucionet e drejtësisë luajnë një rol kyç në përmirësimin e kësaj situate në Kosovë.

“Fakti se shumica e rasteve të vrasjeve të gazetarëve tashmë janë mbyllur, siç u shpjegua gjatë konferencës nga Shefja e EULEX në Kosovë, është skajshmërisht shqetësues për ne. Megjithatë, ne i ftojmë të gjitha institucionet përkatëse që të mos ndërprenë hetimet derisa të gjitha këto raste të zgjedhen – pasi se kurrë nuk është vonë për drejtësi”, thuhet në këtë reagim të përbashkët të AGK-së dhe UNS-së.

“Ne përkushtohemi që të punojmë bashkë dhe të kemi nisma të përbashkëta në kërkimin tonë për drejtësi dhe procedim më efektiv të të gjitha rasteve eventuale që ndërlidhen me gazetarët në të ardhmen”, përfundon ky reagim. 

© KOHA. Të gjitha të drejtat janë të rezervuara.