Lansohet Strategjia sektoriale për përmirësimin e Shëndetësisë

13 Shkurt 2017 - 11:11      

Ministri i Shëndetësisë, Imet Rrahmani, tha sot se Strategjia sektoriale e shëndetësisë 2017-2021 është dokumenti kryesor që përcakton drejtimin dhe qasjen strategjike afatmesme të zhvillimit të sistemit shëndetësor në Republikën e Kosovës.

Sipas ministrit Rrahmani, qëllimi i këtij dokumenti është jetësimi i vizionit për ofrimin e shërbimeve shëndetësore cilësore dhe të sigurta për të gjithë qytetarët e vendit.

Ai u shpreh se analiza e gjendjes aktuale të sistemit shëndetësor ka paraqitur nevojën e zhvillimit të ndryshimeve dhe zbatimit të reformës në sistemin shëndetësor, qoftë në aspektin e riorganizimit të sistemit aktual dhe institucioneve gjegjëse, ashtu edhe në sigurimin e qëndrueshmërisë financiare të sistemit.

Sipas Mybera Mustafës, këshilltare e kryeministrit për shëndetësi, strategjia sektoriale 2017- 2021, ka qenë e nevojshme për kohën dhe ofron kornizën se si do të funksionojë shëndetësia në pesë vitet e ardhshme.

Gjithashtu, ajo tha se kabineti i kryeministrit premton se sektori i shëndetësisë do të gjejë mbështetje në këtë institucion për përmirësim të shëndetësisë së Kosovës.

Ambasadorja e Luxenburgut, Anne Dostert, duke marrë pjesë në debat, u shpreh se miratimi dhe lansimi i kësaj strategjie tregon përkushtimin për të përmirësuar shëndetësinë kosovare.