Kontrabandohet radari ajror nga Shqipëria në Kosovë [video]

12 Shkurt 2017 - 19:07      

Rreth 8 milionë euro i ndau shteti për të blerë këtë radar sekondar, por që mijëra euro të tjera po hyjnë në të, edhe pse ka më pak se 4 vjet qëkur u ble.

Radari i Goleshit vazhdimisht ka pasur prishje, pavarësisht që kompania që e shiti thotë se atë e solli të ri, e po ashtu edhe ASHNA-ja zotohet se ishte i ri, raporton KTV.

Prishja e fundit i detyroi zyrtarët e Agjencisë që në natën e ndërrimit të moteve ta importojnë në mënyrë klandestine një pjesë rrotulluese “rotary joint”, e të cilën më pas e modifikuan në një punëtori mekanike në Ferizaj.

Por specifikacionet e kësaj pjese që ASHNA-ja thotë se e huazoi nga Shqipëria nuk janë në përshkrimin e dokumenteve të pajisjeve që kompania e kontraktuar nga Shqipëria TCN ia dorëzoi Agjencisë.

Sidoqoftë, pajisja e cila bazuar në raportin e inxhinierëve u montua në radarin e Goleshit më 3 janar pas orës 16, në doganat e Kosovës u lajmërua vetëm më 6 shkurt, disa ditë pasi KTV-ja kishte nisur hulumtimin rreth saj.

Në doganë e kanë konfirmuar se malli që është deklaruar më 6 shkurt i shpëtoi penalizimit pasi u vlerësua si deklarim vullnetar.  

© KOHA. Të gjitha të drejtat janë të rezervuara.