Mustafa përshëndet zgjedhjen e Steinmeierit president të Gjermanisë

12 Shkurt 2017 - 17:20      

Ligjvënësit dhe përfaqësuesit e landeve të Gjermanisë e kanë zgjedhur të dielën, Frank-Walter Steinmeier, Presidentin e 12-të Federal të Gjermanisë.

Kryeministri i Kosovës, Isa Mustafa, zgjedhjen e Steinmeierit në këtë post e ka quajtur lajm të mirë për Kosovën, për rajonin dhe për të ardhmen e Bashkimit Evropian.

“Gjermania ka qenë dhe mbetet ndër partnerët strategjikë të Kosovës, që ka kontribuuar shumë në rindërtimin e Kosovës pas luftës, në krijimin e institucioneve demokratike, ka kontribuuar në zhvillimin ekonomik dhe në garantimin e paqes përmes pjesëmarrjes me trupa në KFOR”, thotë Mustafa.

Me Presidentin Steinmeier, sipas Mustafës, vendet e Ballkanit do të kenë një zë të fuqishëm në BE për të nxitur politikat e zhvillimit, integrimin e rajonit tonë në BE dhe për të garantuar paqen në këtë pjesë të Evropës.

“Qeveria dhe unë personalisht jemi të gatshëm që miqësinë dhe partneritetin strategjik me Gjermaninë ta vazhdojmë me nxitjen e bashkëpunimit ekonomik, sidomos nëpërmes inkurajimit të investimeve nga Gjermania dhe vendet tjera perëndimore në Kosovë”, ka përfunduar kreu i ekzekutivit, Isa Mustafa. 

© KOHA. Të gjitha të drejtat janë të rezervuara.