Fatmir Sejdiu: Fajtori i harruar

12 Shkurt 2017 - 18:20      

“E diela me Koha Ditore” në këtë numër, në vend të intervistës së javës, ka bërë një këndvështrim redaksional për ata që mund t’i identifikohen si fajtorët kryesorë pse këta nëntë vjet të Pavarësisë nuk prodhuan një Kosovë ndryshe.

Sigurisht, dikush mund të mos pajtohet me këtë listë, dhe shumëkush – përfshirë ne – do të thoshte se lista është shumë-shumë më e gjatë se kaq. Por, ky është një vështrim yni, në të cilin jemi kufizuar në 9 fajtorë për 9 vjet të çuar kryesisht dëm.

Fatmir Sejdiu: Fajtori i harruar,

Fatmir Sejdiu është njeriu që ia dha mundësinë PDK-së të ngrihej në pushtet dhe që të qeveriste për këta nëntë vjet. Nën drejtimin e tij, LDK-ja u nda dhe humbi primatin për herë të parë në histori të saj.

Kjo ndodhi më pak se një vit pas vdekjes së liderit historik të LDK-së, Ibrahim Rugova, meqë lufta për të zënë karrigen e boshatisur në krye të partisë rezultoi me Sejdiun kryetar pas një Kuvendi të tensionuar partiak, që u mbyll me përplasje të dhunshme me karrige dhe braktisjen e LDK-së nga një pjesë e saj, nën udhëheqjen e Nexhat Dacit.

Sidoqoftë, Sejdiu e mori kryesimin e partisë së Rugovës, dhe shumë shpejt, në zgjedhjet e vitit 2007, u mposht nga PDK-ja. Por, mbetja në pushtet dhe ruajtja e pozitës së presidentit të vendit, ishte motiv i mjaftueshëm për Sejdiun të hynte në koalicion me rivalin (e për disa edhe armikun) më të madh të LDK-së – PDK-në dhe Thaçin.

Ky koalicion vuri bazat e një abuzimi me pushtetin, qoftë duke politizuar skajshëm administratën, qoftë duke thelluar korrupsionin e keqqeverisjen. Sejdiu po ashtu nuk dha shembullin e një presidenti që përfaqëson unitetin e popullit. Ai njëkohshëm drejtoi edhe LDK-në, gjë për të cilën Gjykata Kushtetuese e gjeti në shkelje, zhvillim ky që e çoi në dorëheqje. Ai krijoi edhe një precedent të rrezikshëm për vendin – tërhoqi ministrat nga Qeveria e drejtuar nga Thaçi, sapo Kushtetuesja dha verdiktin ndëshkues për të. Dha dorëheqje nga posti i kryetarit për t'i ruajtur beneficionet sipas Ligjit për presidentin.

Pas largimit të detyruar nga Presidenca, Sejdiu e humbi edhe luftën në parti (më 2010), ku fronin ia mori Isa Mustafa.

LDK-ja mbeti në opozitë, ndërsa Fatmir Sejdiu u “leçit” nga kreu i partisë së tij, dhe u reduktua në një “kryetar nderi”, që askush nuk e nderon. Përpjekjet e tij për të faktorizuar veten vazhduan, por kot. Ai mbetet i harruar sot, edhe pse ishte një prej shtyllave kryesore që më 2008 e bënë Kosovën kështu si është sot: vend me një pushtet të korruptuar e të kriminalizuar dhe skenë politike të tensionuar deri në armiqësi!

Lexo në numrin e sotëm të Kohës Ditore edhe për 8 fajtorët e tjerë: Hashim Thaçi: Kryefajtori, Atifete Jahjaga: 5 vjet në zarf, Isa Mustafa: Paterica e Hashimit, Albin Kurti: Ideologu i gazit, Kadri Veseli: Në hijen e SHIK-ut, Behgjet Pacolli: Biznesi + politika = afera e skandale, Edita Tahiri: “Zonja Fjollë”*, Ramush Haradinaj: Kryeministri i opozitës. 

© KOHA. Të gjitha të drejtat janë të rezervuara.