Behgjet Pacolli: Biznesi + politika = afera e skandale

12 Shkurt 2017 - 17:20      

“E diela me Koha Ditore” në këtë numër, në vend të intervistës së javës, ka bërë një këndvështrim redaksional për ata që mund t’i identifikohen si fajtorët kryesorë pse këta nëntë vjet të Pavarësisë nuk prodhuan një Kosovë ndryshe.

Sigurisht, dikush mund të mos pajtohet me këtë listë, dhe shumëkush – përfshirë ne – do të thoshte se lista është shumë-shumë më e gjatë se kaq. Por, ky është një vështrim yni, në të cilin jemi kufizuar në 9 fajtorë për 9 vjet të çuar kryesisht dëm.

Behgjet Pacolli: Biznesi + politika = afera e skandale,

Behgjet Pacolli ishte për një mandat pjesë e pushtetit, kohë gjatë së cilës demonstroi disa politika të jashtëligjshme. Ishte përkohësisht president dhe pastaj zëvendëskryeministër.

Ai kishte arritur synimin jetësor për t’u vënë në majë të pushtetit, por krenaria mundi t’i zgjaste jo më shumë se 35 ditë. Kushtetuesja dha verdiktin që ishte një president i rrejshëm, meqë procedura e zgjedhjes ishte antikushtetuese. Nga shef shteti, ra në Ekzekutiv për të dëgjuar urdhrat e kryeministrit. E bënë zëvendëskryeministër për njohje dhe investime të huaja.

Kosova mundi të siguronte vetëm disa njohje gjatë kësaj kohe. Dhe, në proces lobimi, bëri edhe skandale diplomatike, sikur ai me Nigerinë që thoshte t’ia ketë njohur shtetësinë Kosovës. Në fakt, kishte prezantuar disa njohje nga vende afrikane, e që nuk ishin të tilla. Përgënjeshtrimin fillimisht e pati marrë nga vetë sekretarja amerikane e shtetit, Hillary Clinton.

Gjatë kësaj kohe, emri i miliarderit u përmend në disa afera korruptive, përfshirë edhe atë të procesit të dështuar të privatizimit të hotelit “Grand”. Në kapacitetin prej zëvendëskryeministri, ai firmosi një marrëveshje në Nigeri për të investuar jo më pak se 1.4 miliardë euro, ndërkaq bëri disa përpjekje për të marrë kontrollin edhe mbi “Trepçën”.

Lexo në numrin e sotëm të Kohës Ditore edhe për 8 fajtorët e tjerë: Hashim Thaçi: Kryefajtori, Atifete Jahjaga: 5 vjet në zarf, Isa Mustafa: Paterica e Hashimit, Albin Kurti: Ideologu i gazit, Kadri Veseli: Në hijen e SHIK-ut, Edita Tahiri: “Zonja Fjollë”*, Fatmir Sejdiu: Fajtori i harruar, Ramush Haradinaj: Kryeministri i opozitës. 

© KOHA. Të gjitha të drejtat janë të rezervuara.