Albin Kurti: Ideologu i gazit

12 Shkurt 2017 - 16:20      

“E diela me Koha Ditore” në këtë numër, në vend të intervistës së javës, ka bërë një këndvështrim redaksional për ata që mund t’i identifikohen si fajtorët kryesorë pse këta nëntë vjet të Pavarësisë nuk prodhuan një Kosovë ndryshe.

Sigurisht, dikush mund të mos pajtohet me këtë listë, dhe shumëkush – përfshirë ne – do të thoshte se lista është shumë-shumë më e gjatë se kaq. Por, ky është një vështrim yni, në të cilin jemi kufizuar në 9 fajtorë për 9 vjet të çuar kryesisht dëm.

Albin Kurti: Ideologu i gazit,

Hise të fajit pse këta nëntë vjet të Pavarësisë nuk prodhuan një Kosovë ndryshe ka edhe lideri kryesor opozitar, Albin Kurti. Ai është ndër themeluesit e Lëvizjes Vetëvendosje, parti kjo e cila kombinon aktivitetin politik brenda dhe jashtë institucioneve, duke mos i zgjedhur metodat.

Vetëvendosje ka qenë kundërshtare e Pakos së Ahtisaarit, dokument mbi bazën e të cilit Kosova shpalli Pavarësinë në shkurt të vitit 2008. Albin Kurti i ka shpallur luftë demokratike me mjete jodemokratike shtetit të Kosovës.

Duke iu kundërvënë Qeverisë pas arritjes së marrëveshjes për themelimin e Asociacionit të komunave me shumicë serbe dhe marrëveshjes për demarkacionin e kufirit me Malin e Zi, Kurti ishte i pari që instaloi përdorimin e lëndëve kimike në përballjet politike. Këto veprime shokuan qytetarët dhe zunë vend kryesor në media ndërkombëtare.

Përveç si vend i krimit e korrupsionit, Kosova tani prezantohej edhe si shtet ku tempulli i demokracisë sulmohet me gaz lotsjellës. Me gjithë kundërshtimet ndaj metodave që vendosi të aplikojnë opozitarët, bombolat e gazit u hodhën edhe prej deputetëve tjerë opozitarë nga AAK-ja dhe Nisma. Për Kurtin gazi lotsjellës nuk është dhunë, por “Zajednica” është dhunë.

Kurti, i cili ka qenë pjesëmarrës i shumë protestave para dhe pas luftës në Kosovë, arsyetonte veprimet e tij se në protesta i kanë “ngrënë” mijëra bombola gazi. Ashpërsia e Kurtit dhe e subjektit që ai drejton nuk është treguar vetëm në raport me pushtetin.

Si partia më e madhe opozitare, Vetëvendosje nuk arriti ta mbante gjallë koalicionin me AAK-në dhe Nismën, i cili shihej si opsioni më i mirë që mund t’u kundërvihej dy partive më të mëdha, PDK-LDK, kurdo që të mbaheshin zgjedhjet e ardhshme.

Lexo në numrin e sotëm të Kohës Ditore edhe për 8 fajtorët e tjerë: Hashim Thaçi: Kryefajtori, Atifete Jahjaga: 5 vjet në zarf, Isa Mustafa: Paterica e Hashimit, Kadri Veseli: Në hijen e SHIK-ut, Behgjet Pacolli: Biznesi + politika = afera e skandale, Edita Tahiri: “Zonja Fjollë”*, Fatmir Sejdiu: Fajtori i harruar, Ramush Haradinaj: Kryeministri i opozitës. 

© KOHA. Të gjitha të drejtat janë të rezervuara.