Isa Mustafa: Paterica e Hashimit

12 Shkurt 2017 - 15:50      

“E diela me Koha Ditore” në këtë numër, në vend të intervistës së javës, ka bërë një këndvështrim redaksional për ata që mund t’i identifikohen si fajtorët kryesorë pse këta nëntë vjet të Pavarësisë nuk prodhuan një Kosovë ndryshe.

Sigurisht, dikush mund të mos pajtohet me këtë listë, dhe shumëkush – përfshirë ne – do të thoshte se lista është shumë-shumë më e gjatë se kaq. Por, ky është një vështrim yni, në të cilin jemi kufizuar në 9 fajtorë për 9 vjet të çuar kryesisht dëm.

Isa Mustafa: Paterica e Hashimit,

Të dëshpëruar nga humbja e zgjedhjeve të 8 qershorit 2014, kryetari i LDK-së, aktualisht kryeministër Isa Mustafa, nënshkroi marrëveshje për bashkëqeverisje me AAK-në dhe Nismën. Për PDK-në rezervuan përgjigje negative në rast të ftesave për ta ndërtuar koalicionin. Treshen e opozitës nga 10 shtatori e forcoi edhe Lëvizja Vetëvendosje.

Në takimet e shpeshta, Mustafa nuk e lëshonte nga goja keqqeverisjen e PDK-së dhe qëllimin për ta përplasur atë në opozitë. Por, ky unitet i bllokut qëndroi deri në momentin kur opozitarët u bindën se posti i kryetarit të Kuvendit i takon vetëm PDK-së, si fituese e zgjedhjeve. Pazari për kulaçin e pushtetit theu bllokun opozitar. Mustafa nuk e pati problem që pas gjashtë muajsh ta bëjë transformimin rrënjësor, duke pranuar të hyjë në koalicion me PDK-në.

Kështu akademiku Mustafa ngjiti majat e pushtetit në Kosovë, duke u ndihmuar nga rivali më i madh politik, Hashim Thaçi, ndaj të cilit dhe partisë që ai drejton ka drejtuar edhe gishtin për vrasjet e aktivistëve të LDK-së, pas luftës në Kosovë. Mustafa kishte akuzuar PDK-në edhe për kapje të shtetit në të gjitha nivelit e shtetit. Sa ishte kryetar i Prishtinës, Mustafa kritikonte partnerin aktual për nepotizëm, emërime politike nëpër borde e agjenci të pavarura dhe partizim të shtetit. Por Isa Mustafa po ndjek të njëjtën politikë të kapjes së shtetit sikurse Hashim Thaçi.

Ai po e shtrin ndikimin qeveritar edhe në institucionet që janë të thirrura të veprojnë të pavarura, duke shpërfillur madje edhe sugjerimet e Raportit të Progresit. Pak ditë pas publikimit të Raportit të Komisionit Evropian në vitin 2015, i cili kërkonte shmangien e ndikimeve politike në gjyqësor dhe agjenci të pavarura, Qeveria kishte vendosur në krye të bordeve njerëzit që deri vonë i shërbenin partisë.

Gjatë qeverisjes Mustafa, vendi u përball edhe me protesta të mëdha, si rezultat i marrëveshjes për Asociacionin dhe demarkacionin. Me Mustafën kryeministër, vetëm gjatë vitit 2014-2015 nga Kosova drejt vendeve të Bashkimit Evropian ikën rreth 100 mijë qytetarë, për shkak të varfërisë e papunësisë, ani që i kishte premtuar 100 mijë vende pune. Plus është zgjedhur me aklamacion në krye të LDK-së.

Lexo në numrin e sotëm të Kohës Ditore edhe për 8 fajtorët e tjerë: Hashim Thaçi: Kryefajtori, Atifete Jahjaga: 5 vjet në zarf, Albin Kurti: Ideologu i gazit, Kadri Veseli: Në hijen e SHIK-ut, Behgjet Pacolli: Biznesi + politika = afera e skandale, Edita Tahiri: “Zonja Fjollë”*, Fatmir Sejdiu: Fajtori i harruar, Ramush Haradinaj: Kryeministri i opozitës. 

© KOHA. Të gjitha të drejtat janë të rezervuara.