Rudi dorëzon letrat kredenciale te presidenti i Panamasë

10 Shkurt 2017 - 16:51      

Ambasadorja e Republikës së Kosovës në Panama, Zana Rudi, i ka dorëzuar letrat kredenciale te presidenti i Panamasë, Juan Carlos Varela Rodriguez.

Ceremonia solemne e dorëzimit të letrave kredenciale është zhvilluar në Pallatin Presidencial të Panamasë “Las Garzas” me një pritje të gardës ceremoniale dhe nën intonimnin e himnit të të dy vendeve.

Më pas, ambasadorja Rudi u prit nga presidenti i Republikës së Panamasë, Juan Carlos Varela Rodriguez, të cilit i përcolli përshëndetjet e presidentit të Republikës së Kosovës, Hashim Thaçi, bashkë me falënderimin për përkrahjen dhe bashkëpunimin që Panamaja i ka ofruar Kosovës deri më tani.

“Jam e nderuar që e përfaqësoj Republikën e Kosovës si ambasadorja e parë në Panama, vend ky mik i Kosovës dhe përkrahës i madh në arenën ndërkombëtare”, tha ambasadorja Rudi.

Ajo shtoi se kthehet në Panama, tani në postin e ambasadores, me përkushtim të vazhdueshëm për thellimin e marrëdhënieve dypalëshe dhe për fuqizimin e imazhit të Kosovës në këtë vend dhe më gjerë.

Me këtë rast presidenti Varela dhe ambasadorja Rudi kanë biseduar edhe për mundësitë e zgjerimit të bashkëpunimit ndërmjet dy vendeve në fusha të interesit të përbashkët duke mëtuar përafrimin e mëtejm të dy popujve.
Me dorëzimin e kredencialeve, tashmë Republika e Kosovës përfaqësohet në nivel të ambasadores në Republikën e Panamasë për herë të parë pas njohjes në vitin 2009 dhe vendosjes së marrëdhënieve diplomatike dhe hapjes së ambasadës në Panama në vitin 2013.

© KOHA. Të gjitha të drejtat janë të rezervuara.