BE parapëlqen qeveri gjithëpërfshirëse në Maqedoni

9 Shkurt 2017 - 15:10      

E rëndësishme është që të formohet qeveri gjithëpërfshirëse, tha sot eurokomesari për Zgjerim i BE-së, Johannes Hahn, në konferencën për media pas takimit ministror të Ballkanit Perëndimor, që u mbajt në MPJ të Maqedonisë.

Hahn, siç transmeton ina, potencoi se në Shkup ka ardhur që të dëgjojë partitë politike dhe se porosia e tij është se vendi ka përparuar mjaft, por që hapi i radhës është formimi i qeverisë. Hahn ka theksuar se të gjithë duhet të jenë të vetëdijshëm për përgjegjësinë e tyre dhe interesat e shtetit.

“Unë nuk do të jap kurrfarë propozimesh. Vendimin përfundimtar do të duhet ta marrin politikanët e vendit. Ndoshta rezultati i zgjedhjeve ka befasuar dikë, por tani do të duhet të formohet qeveria, ndërkaq vendimet demokratike do të duhet t’i respektojnë të gjitha partitë politike”, ka theksuar Hahn.