Kryeministri thotë se rivitalizimi i urës në Mitrovicë po zbatohet 100 për qind

8 Shkurt 2017 - 10:27      

Kryeministri i vendit, Isa Mustafa, deklaroi se projekti për rivitalizimin e urës është duke u zbatuar 100 për qind deri në këto momente, transmeton servisi publik.

Ai tha se është arritur një marrëveshje, e cila është në përputhje me ligjin dhe se është bërë zgjidhja më e mirë e mundshme pasi që atë strukturë e ka larguar vetë komuna e Mitrovicës.

Ai ka thënë se ka pasur takime intensive me përfaqësuesit e komunës së Mitrovicës Veriore, kryetarin e komunës si dhe përfaqësuesit politik të serbëve, për të gjetur zgjidhje për çështjen e murit në Mitrovicë.

Kryeministri i Kosovës Isa Mustafa sot në mbledhjen e Qeverisë i ka informuar ministrat lidhur me rrëzimin e murit në pjesën veriore të Mitrovicës.

Mustafa tha se lidhur me rrëzimin e murit është arritur një marrëveshje e mirë dhe ligjore.

Kryeministri tha se edhe komuna e Mitrovicës e ka kryer punën në përputhshmëri me marrëveshjen e arritur.

Në lidhje me murin e ndërtuar matanë urës së Ibrit ka folur edhe ministri i Mjedisit Ferat Shala tha se që nga nisja e ndërtimit të murit janë ndërmarr masat ku janë ndërprerë punimet dhe janë marr të gjitha masat ligjore deri në arritjen e marrëveshjes.

Shala tha se kanë respektuar ligjin me përpikmëri dhe kanë zbatuar Kushtetutën.

Ai tha se marrëveshja është legale dhe është bërë me pajtimin e institucioneve dhe deri më tani është zbatuar plotësisht.

© KOHA. Të gjitha të drejtat janë të rezervuara.