SPRTK takon Veselin, i tregon për keqmenaxhimin financiar në mediumin publik

7 Shkurt 2017 - 14:31      

Drejtuesit e Sindikatës së Pavarur të RTK-së, Fadil Hoxha dhe Arsim Halili janë takuar me kryetarin e Kuvendit, Kadri Veseli.

Gjatë këtij takimi, sindikalistët e kanë njoftuar kryeparlamentarin me gjendjen e përgjithshme në Transmetuesin Publik dhe problemet me të cilat përballet ky medium si pasojë e keqmenaxhimit.

“Drejtuesit e sindikatës kanë shprehur shqetësimin për borxhet milionëshe në të cilat është zhytur mediumi publik, blerjen pa kontroll e pa mbulesë financiare të produkteve të jashtme, pagat e dyfishta klienteliste dhe shpenzimet enorme për pagat dhe mëditjet e bordit drejtues dhe stafit megaloman menaxherial përfshirë mbi 10 këshilltarë, të cilat kapin shifrën prej mbi 600 mijë eurosh në vit”, thuhet në njoftimin për media të SPRTK-së.

SPRTK kërkoi transparencë në draftimin e ligjit për RTK-në, krijimin e mekanizmave për rritjen e llogaridhënies financiare, uljen e shpenzimeve të panevojshme, në mënyrë që prodhimi të orientohet nga stafi i brendshëm, i cili thanë se po anashkalohet çdo ditë e më shumë.

Kjo Sindikatë thotë se sipas Ligjit për RTK-në, Kuvendi i Kosovës është themelues i Transmetuesit Publik dhe ka për obligim ligjor të garantoj funksionimin e pavarur të RTK-së dhe ta mbikëqyrë shpenzimin e parasë publike.

Në vazhdën e njoftimit me situatën e përgjithshme në RTK dhe ndryshimet në ligjin për këtë medium, SPRTK ka zhvilluar takime me grupet parlamentare të PDK-së, LDK-së, Vetëvendosjes, AAK-së dhe Nisma-s. 

© KOHA. Të gjitha të drejtat janë të rezervuara.