Nga UP-ja pritet që të ndëshkojë edhe profesorët në poste politike [video]

6 Shkurt 2017 - 19:27      

Në këtë periudhë, kur studentët e universiteteve publike janë të angazhuar me provime, shpeshherë detyrohen të presin me orë të tëra derisa të vjen profesori i lëndës për të mbajtur provimin.

Kështu ndodhi edhe sot, me ç’rast ekipi i KTV-së qëndroi në Fakultetin e Filologjisë, departamenti i Letërsisë Shqipe, ku studentët e vitit të katërt po prisnin profesorin Kujtim Shala për provimin e caktuar.

Por, pas gjysmë ore vonesë, si rëndom provimin nuk e mban profesori Shala por asistentja e tij, Albana Mehmetaj.

Studentët megjithëse jo para kamerës, janë shprehur se Shala pothuajse asnjëherë nuk është i pranishëm në fakultet.

KTV ka kërkuar të flasë me asistenten e tij që është angazhuar për të mbajtur provimin, por ajo nuk ka dashur të prononcohej.

Përgjigje nuk ka kthyer as vetë ministri Shala kur është pyetur se cilën nga punët e tij e ka deklaruar si primare, meqë ai është ministër i Kulturës, anëtar i Akademisë së Shkencave dhe profesor universiteti.

Lexo edhe: UP-ja u ndërpret kontratat 15 profesorëve që punonin në dy vende e s’mbanin ligjërata [video]

Studentët megjithëse ankohen, para kamerës janë të rezervuar kur flasin për vijueshmërinë e profesorëve në ligjërata e provime me arsyetimin se ata mund t’u hakmerren.

Por, çka mund të thonë është se profesorët të cilët janë pjesë e politikës janë pjesa më problematike.

Për ministrin Arsim Bajrami njëri student thotë se provimet i mban, por në ligjërata shpeshherë nuk është i pranishëm.

Por, ministri Bajrami i pyetur më herët për këtë çështje, ka thënë se ai shkon me kohë në ligjërata dhe është shumë i përgatitur edhe për provime.

Deputetë e politikanë të shumtë, janë të angazhuar në Universitetin e Prishtinës me gjysmë norme.

KTV ka kërkuar përgjigje edhe nga prorektorja për cilësi Teuta Pustina Krasniqi nëse këta profesorë po i respektojnë kontratat, por ajo nuk ka kthyer përgjigje.

Kryetari i unionit të Studentëve të Kosovës Arbër Mehmeti thotë se ka pasur ankesa të shumta të studentëve që janë ankuar për mosprezencën e profesorëve.

Ai tha se e njëjta ndodh edhe me universitetet tjera publike në vend.
Në mungesë të kuadrit sipas tij, Universiteti i Prishtinës u ndihmon universiteteve tjera me staf, por mbetet keq edhe për vete, në të shumtën e rasteve.

Një profesor i rregullt pagë fikse e ka shumën 1200 euro plus benifitet tjera.

Një asistent paguhet deri në 700 euro. Ndërsa bashkëpunëtori i jashtëm për një orë ligjërate merr 25 euro.

© KOHA. Të gjitha të drejtat janë të rezervuara.