Synohet sjellja e investimeve italiane në Kosovë

6 Shkurt 2017 - 16:43      

Zëvendësministrja për Integrim Evropian, Anila Statovci-Demaj priti në takim Ambasadorin e Italisë në Kosovë, Piero Cristoforo Sardi, ku është diskutuar për proceset të cilat ndërlidhen me agjendën evropiane të Kosovës, nga zhvillimi i politikave gjeostrategjike deri tek lëvizja e lirë dhe Liberalizimi i vizave për qytetarët e Kosovës, sikurse edhe ndikimit të zgjedhjeve në vendet e BE-së me zhvillimet në Kosovë.

Më në detaje në takim është diskutuar edhe për mundësitë e bashkëpunimit ndërmjet dy institucioneve, veçmas për avancimin në agjendën evropiane të vendit tonë.

Me këtë rast, Statovci-Demaj e njoftoi Ambasadorin italian për zhvillimet aktuale në kuadër të procesit të integrimit evropian, respektivisht avancimit të Kosovës në zbatimin e MSA-së dhe sfidat e dala në proces.

Ajo tha se ka pasur zhvillime pozitive në këtë proces dhe se “Kosova është duke ecur me hapa të duhur me implementimin e MSA-së dhe krahasuar me shtetet e rajonit që kanë kaluar në këtë proces, Kosova është duke qëndruar mirë”.

Nga ana e tij, siç thuhet në komunikatën e MIE-së, ambasadori Sardi konfirmoi gatishmërinë e Qeverisë italiane për të ndihmuar Kosovën dhe posaçërisht në procesin e integrimit evropian pasi që “është një metodë e mirë për kultivimin e së ardhmes së shoqërisë në të gjitha sferat dhe të bashkëjetesës së komuniteteve brenda një shteti”.

Zëvendësministrja e falënderoi ambasadorin italian për përkushtimin e tij personal që të kontribuoj në zhvillimin e Kosovës, respektivisht në punën që është duke e bërë për të zhvilluar prezencën e investitorëve italianë në Kosovë. 

© KOHA. Të gjitha të drejtat janë të rezervuara.