Të enjten Kuvendi, do të debatohet edhe për të ardhmen e FSK-së

6 Shkurt 2017 - 13:46      

Seanca e radhës e Kuvendit të Kosovës do të mbahet të enjten. Kështu ka vendosur sot Kryesia e legjislativit në mbledhjen me kryetarët e grupeve parlamentare.

Sipas këtij vendimi, seanca do të fillojë në orën 10:00 dhe në rend të ditës do të ketë 23 pikë, transmeton Koha.net.

Por, Kryesia ka vendosur që edhe javën e ardhshme të vazhdohet me dy seanca: njëra më 14 shkurt dhe tjetra më 15 shkurt, derisa të shqyrtohen dhe miratohen të gjitha pikat e rendit të ditës.

Ndër pika të parapara për këtë seancë nuk ka tema që lidhen me çështjen e demarkacionit me Malin e Zi, as me formimin e Asociacionit të Komunave Serbe, për të cilat ka pasur përplasje të ashpra midis pozitës e opozitës. Por, në rend të ditës do të gjendet një debat rreth të ardhmes së FSK-së, një çështje po ashtu e nxehtë, që ka tërhequr vëmendjen jo vetëm të deputetëve, por edhe të opionit të gjerë. Kryesia në këtë mënyrë ka vendosur ta miratojë kërkesën e Deputetit të AAK-së , Daut Haradinaj, për debat për FSK-në.

Gjithashtu do të mbahen dy interpelanca të kryeministrit Isa Mustafa, njëra për gjendjen aktuale në veri të Mitrovicës dhe tjetra për sigurimet shëndetësore.

Rendi i ditës për të enjten duket si në vazhdim:

R e n d i i d i t ë s

1. Miratimi i procesverbalit nga mbledhja e mëparshme,

2. Përgatitjet për seancë plenare:

1. Koha për deklarime jashtë rendit të ditës,

2. Koha për pyetje parlamentare,

3. Miratimi i procesverbalit nga seanca e mëparshme,

4. Votimi i Propozim-rezolutës në lidhje me organizimin e arsimit parashkollor, parafillor dhe parauniversitar në Kosovë,

5. Votimi i Propozim-rezolutës në lidhje me arrestimet e aktivistëve të Lëvizjes Vetëvendosje,

6. Formimi i Komisionit ad-hoc për përzgjedhjen e një (1) anëtari të Bordit të Radiotelevizionit të Kosovës.

7. Interpelanca e Kryeministrit të Kosovës Isa Mustafa, sipas kërkesës së deputetit Rexhep Selimi, i mbështetur edhe nga 14 deputetë nënshkrues, në lidhje me situatën e krijuar në Mitrovicë,

8. Interpelanca e Kryeministrit të Kosovës Isa Mustafa, sipas kërkesës së deputetit Visar Ymeri, i mbështetur edhe nga 8 deputetë nënshkrues, në lidhje me përgjegjësinë mbi Ligjin e sigurimeve shëndetësore në Republikën e Kosovës,

9. Votimi i Projektligjit për ndryshimin dhe plotësimin e Ligjit për Lirinë Fetare në Kosovë, (për miratimin e këtij Projektligji kërkohen, të paktën 61 vota „Për“, prej tyre 11 vota „Për“ të komuniteteve që nuk janë shumicë) Amendamenti 2, i Kushtetutës së Republikës së Kosovës, në nenin 81, paragrafi1),

10. Shqyrtimi i Projektligjit nr. 05/L-137 për ratifikimin e Marrëveshjes përkitazi me themelimin e Fondit të Ballkanit Perëndimor,

11. Shqyrtimi i Projektligjit nr. 05/L-149 për ratifikimin e Marrëveshjes për themelimin e Zyrës rajonale për bashkëpunim rinor në mes Kosovës, Shqipërisë, Bosnjës dhe Hercegovinës, Malit të Zi, Maqedonisë dhe Serbisë,

12. Shqyrtimi i parë i Projektligjit nr. 05/L-129 për ndryshimin dhe plotësimin e Ligjit nr. 04/L-149 për ekzekutimin e sanksioneve penale,

13. Shqyrtimi i parë i Projektligjit nr. 05/L-127 për plotësimin e Ligjit nr. 04/L-033 për Dhomën e Posaçme të Gjykatës Supreme të Kosovës për çështjet në lidhje me Agjencinë Kosovare të Privatizimit,

14. Shqyrtimi i parë i Projektligjit nr. 05/L-150 për ndryshimin dhe plotësimin e Ligjit nr.03/L-209 për Bankën Qendrore të Republikës së Kosovës,

15. Shqyrtimi i parë i Projektligjit nr. 05/L-135 për ndërmjetësim,

16. Shqyrtimi i parë i Projektligjit nr. 05/L-133 për ndryshimin dhe plotësimin e Ligjit nr. 04/L-036 për Statistikat zyrtare të Republikës së Kosovës,

17. Shqyrtimi i parë i Projektligjit nr. 05/L-143 për ndryshimin dhe plotësimin e Ligjit nr.04/L-072 për kontrollin dhe mbikëqyrjen e kufirit shtetëror, i ndryshuar dhe plotësuar me Ligjin 04/L-214,

18. Shqyrtimi i Agjendës për Reforma Evropiane (ARE),

19. Shqyrtimi i Raportit të Komisionit për të Drejtat dhe Interesat e Komuniteteve dhe për Kthim lidhur me mbikëqyrjen e zbatimit të nenit 11 të Ligjit nr. 03/L-149 për Shërbimin Civilë të Republikës së Kosovës,

20. Zgjedhja e një (1) anëtari të Këshillit Gjyqësor të Kosovës nga radha e komunitetit serb,

21. Zgjedhja e një (1) anëtari të Këshillit Gjyqësor të Kosovës nga radha e komuniteteve tjera,

22. Zgjedhja e një (1) anëtari të Bordit për Ankesa të Mediave. 

© KOHA. Të gjitha të drejtat janë të rezervuara.