Më 18 shkurt proteston PD-ja për “ndalimin e krimit”

6 Shkurt 2017 - 11:36      

Tirane, 6 shkurt - Nënkryetari i Partisë Demokratike, Edi Paloka në një deklaratë për mediat akuzoi kryeministrin se del kundër institucioneve dhe mbron krimin.

“Edi Rama ka vendosur të mos zbatojë dekriminalizimin, të mos zbatojë vendimin e prokurorisë, të Komisionit Qendror të zgjedhjeve, madje as vendimin e qeverisë së tij, për largimin e Elvis Rroshit nga detyra e kryetarit të Bashkisë së Kavajës”, u shpreh Paloka.

Sipas Palokës, dje, ministri i Financave i Edi Ramës, jo vetëm shfaqet me përulësi e respekt para Elvis Rroshit, në një aktivitet politik në Kavajë, por e cilëson atë publikisht kryetar Bashkie.

Me veprimin e tij, Edi Rama e ka bërë zero përpjekjen e mundimshme të opozitës e partnerëve ndërkombëtarë dhe vullnetin e popullit për hartimin dhe zbatimin e ligjit të dekriminalizimit.

Ndaj, Plaoka ftoi qytetarët që me 18 shkurt të ngrihen për t’i prerë rrugën krimit në politikë, për ti dhënë mundësinë shqiptarëve të zgjedhin të lire qeverisjen e tyre.