Mustafa: Qeveria po e mban premtimin për zhvillim ekonomik

5 Shkurt 2017 - 16:11      

Kryeministri i Kosovës, Isa Mustafa, thotë se qeveria është duke e mbajtur premtimin për zhvillim ekonomik.

Duke folur për aprovimin e Ligjit për Trepçën, Investimet Strategjike dhe Ligjin për Veteranët, Mustafa në Facebook ka njoftuar se së shpejti do të fillojnë me operacionalizimin e investimit në TC Kosova e Re, prej një miliard euro.

Ky është postimi i plotë i Mustafës:

Qeveria po e mban premtimin për zhvillim ekonomik. Dy vite të këtij mandati i shënuam me rritje të lartë dhe të qëndrueshme ekonomike, me ulje të papunësisë së përgjithshme, me fuqizim të sektorit privat të ekonomisë.

Aprovuam Ligjin për Trepçën, Ligjin për Investime Strategjike, e kaluam fazën e parë të reformave fiskale dhe po e përmbyllim shumë shpejtë fazën e dytë të këtyre reformave. Siguruam ndryshimet e Ligjit për Veteranët dhe plotësuam kërkesat për vazhdim në programin e FMN-së.

Shpejt do të fillojmë me operacionalizimin e investimit në TC Kosova e Re, prej rreth një miliard euro. Do të gjejmë edhe investitor për Brezovicën. Po e zbatojmë Marrëveshjen për Stabilizim Asocim dhe Agjendën e Reformave Evropiane. Të gjithë, me përgjegjësi, po e bëjnë punën e tyre.

E gjithë kjo siguron një rritje të fuqishme ekonomike sidomos në vitet në vijim. Duhet tu gëzohemi sukseseve tona por të synojmë edhe më shumë. 

© KOHA. Të gjitha të drejtat janë të rezervuara.