Policisë s’i duhet leje për të shkuar në veri, thotë Stoltenberg

3 Shkurt 2017 - 22:34      

Sekretari i Përgjithshëm i NATO-s, Jens Stoltenberg, e përshkruan si të qetë situatën e sigurisë në vend.

Ka thënë se së fundi ka pasur tensione të ngritura,por ka ftuar palët që të përmbahen.

Stoltenberg ka thënë se Policisë së Kosovës nuk i duhet leje për të shkuar në veri.

“Duhet të ketë dialog e jo retorikë nxitëse, prandaj gjithsesi se duhet shmangur tensionet”, tha ai duke shtuar se çfarëdo zhvendosje e FSK-së në veri duhet lajmëruar NATO. “Policia e Kosovës mund të operojë në tërë territorin e Kosovës dhe për këtë vendosin institucionet e Kosovës apo Prishtina zyrtare, pra është çështje që u takon institucioneve të Kosovës. Mirëpo, tashmë kemi një situatë stabile dhe duhet të respektohen marrëveshjet e Brukselit që të kemi një rajon të qetë”, tha Stoltenberg për televizionin publik.

Stoltenberg tha se NATO është në Kosovë për ta mbrojtur paqen, derisa ka shtuar se NATO e ka përkrahur zhvillimin e FSK-së dhe nëse mandati i saj ndryshon, atëherë edhe NATO duhet të ndryshojë së përkrahuri këtë dhe ta përkrah atë që krijohet në mënyrë tjetër.