KTV përcolli vizitat e Ramës te Mustafa, Ahmeti e AAK-ja [video]

2 Shkurt 2017 - 19:16      

Kryeministri i Kosovës, Isa Mustafa, ka pritur në një takim të mbyllur për media homologun e tij shqiptar, Edi Rama.

Rama, që në Kosovë është për vizitë zyrtare, ka shprehur vullnetin e Qeverisë së Shqipërisë për thellimin e bashkëpunimit me Kosovën.

Kryeministri Mustafa, sipas komunikatës për media nga zyra e tij, e ka njoftuar Ramën për përkushtimin e qeverisë për zgjerimin e shkëmbimeve dhe raporteve ndërmjet dy vendeve.

Paraprakisht, Rama gjatë ditës qëndroi në selinë e AAK-së, kryetari i së cilës, në bazë të një fletarrestimi serb të 2004-ës, po mbahet me kusht në Francë.

Këtë ndalim, Rama e quajti të tepërt, duke uruar që fundi të jetë ashtu siç e kërkon e drejta.

Nënkryetari i AAK-së, Ardian Gjini, tha se Rama ka nderuar jo vetëm Haradinajn, por të gjithë patriotët shqiptarë dhe qytetarët e Kosovës.

Rama ka takuar edhe kryetarin e Prishtinës, Shpend Ahmeti, pas takimit me të cilin tha se kanë diskutuar për të gjitha çështjet e fundit aktuale në Kosovë.

© KOHA. Të gjitha të drejtat janë të rezervuara.